Կրպակատերերը պահանջում են հստակ չափորոշիչներ մշակել, որպեսզի 2 կողմն էլ իրավաբանորեն պաշտպանված լինի:
Այսօր Հանրային խորհուրդը նիստ էր հրավիրել՝ կրպակատերերին անհանգստացնող բոլոր հարցերը քննարկելու նպատակով:
Նշենք, որ Երեւանի քաղաքապետարանն արդեն 5 ամիս է՝ մայրաքաղաքի կենտրոնական փողոցներից ապամոնտաժում է կրպակաշարերը: «Կրպակատերերի շահերի պաշտպանության» կազմկոմիտեի նախագահ Արեւիկ Ղազարյանի համոզմամբ. «Իրականում այսօր չկա ոչ մի լուրջ պատճառ գործող կրպակներն ապամոնտաժելու համար, սակայն կան լուրջ պատճառներ դրանց գոյությունը պահպանելու համար»: Ըստ նրա, Երեւանի այն կրպակների փոխարեն, որոնք արդեն ապամոնտաժվել են, նորից այլ կրպակներ են հայտնվել, ավելի լավ տեսքով. «Սա նշանակում է, որ կրպակների մեծ մասն ապամոնտաժվել են ընդամենը տեսքի համար: Նշեմ, որ մենք պատրաստ ենք բանակցելու, որպեսզի եղած կրպակատերերը շարունակեն աշխատել, եթե անհրաժեշտ է տեսքը կփոխեն եւ կհամապատասխանեցնեն ներկայիս ճարտարապետությանը: Կրպակատերերի մեծ մասը պատրաստակամ է դա անել: Իսկ մինչ այդ չպետք է կրպակները ապամոնտաժվեն՝ մանավանդ տեսքի անհամապատասխանության համար, որպեսզի այժմյան կրպակատերերը մուրացկաններ չդառնան»:
Կարդացեք նաև
Հանրային խորհրդի անդամ Արշակ Սադոյանը ներկաներին հորդորեց առաջարկություններ անել. «Ի՞նչ անենք, որպեսզի եւ գայլերը կուշտ լինեն եւ ոչխարները»: Պարոն Սադոյանի այս արտահայտությունն ամենեւին դուր չեկավ նիստին ներկա կրպակատերերին: Նրանք բացականչեցին՝ «Գայլերը լավ էլ կուշտ են»: Պարոն Սադոյանը ստիպված եղավ խոսքերը հետ վերցնել: Կրպակատերերից մեկը դիմեց Ա. Սադոյանին. «Ես Կորյուն-Տերյան փողոցների խաչմերուկի կրպակի բանալի պատրաստողն եմ: 1999-ին իմ կրպակը փոխեցի, նորացրեցի, իսկ հիմա ասում են, որ պետք է ընդհանրապես հանեմ: Դուք բազմիցս եկել եք ինձ մոտ եւ ես ձեզ համար բանալիներ եմ պատրաստել: Հիմա ասեք՝ գո՞հ եք, թե՞ դժգոհ իմ աշխատանքից: Մի՞թե մեր քաղաքացիների համար պետք չէ բանալի պատրաստել»:
Մի կրպակատեր էլ առաջարկեց, որ այս հարցում եւ կրպակների նոր վարձակալական պայմանագրերի դեպքում հստակ չափորոշիչներ մշակվեն, որպեսզի 2 կողմն էլ իրավաբանորեն պաշտպանված լինեն:
«Ժառանգություն» կուսակցության պատգամավոր Ստեփան Սաֆարյանն էլ միանալով դժգոհություններին՝ ասաց, որ ապամոնտաժման մասին ծանուցագիր են ստացել անգամ այն կրպակները, որոնք 50-60 տարի աշխատել են եւ խորհրդային տարիներին հենց կրպակներ դնելու համար նրանց այդ տարածքները հատկացվել են գենպլանով:
Անուշ ԽԵՉՈՅԱՆ
