Այսօր Մամուլի ազգային ակումբը ԱՄՆ ժողովրդավարական ինստիտուտի հետ համատեղ կազմակերպել էր քննարկում՝ «Բարձրագույն կրթական համակարգի բարեփոխումները Հայաստանում. մարտահրավերներ, արդյունքներ, հեռանկարներ» թեմայով: Քննարկմանը ներկա էին ԿԳ նախարար Արմեն Աշոտյանը եւ տարբեր կուսակցություններից անդամներ:
Հայաստանում կրթական բարեփոխումները հիմնված են բոլոնյան գործընթացի վրա: Այդ մասին խոսում էին քննարկման մասնակիցները: Արդեն 6 տարի է՝ Հայաստանում իրականացվող այս բարեփոխումները բախվում են մի շարք խնդիրների: «Բոլոնիայի գործընթացով պայմանավորված հիմնական փոփոխությունները մեզ մոտ արդեն արված են: Հայաստանում ներդրված է եռաստիճան կրթական համակարգ՝ բակալավր, մագիստր, հետազոտող, կրեդիտի կուտակման եւ փոխանցման համակարգը, ինստիտուցիոնալ մակարդակով ապահովված ենք այնպիսի կրթական հաստատություններով, որոնք անհրաժեշտ են որակյալ կրթություն ապահովելու համար»,- ասում է ԿԳ նախարարը՝ ավելացնելով, որ խնդիրը հասարակության մեջ այդ փոփոխությունների նկատմամբ տրամադրությունը փոխելն է: Նրա խոսքով. «Պետք է Հայաստանում երաշխավորված լինի, որ կիրթ մարդը իր մասնագիտական աշխատանքով ապրելու է բարեկեցիկ կյանքով: Եթե կրթությունը, աշխատաշուկան փոխկապակցված չեն, ապա խիստ տրամաբանական կապը՝ լավ կրթվել, լավ աշխատել, լավ ապրել, խզվում է…Ստացվում է՝ լավ սովորելով՝ լավ չես ապրի: Երբ կոտրենք այս արատավոր կարծրատիպը, իրականում կապահովենք բեկումային աճ»: ԱԺ «Ժառանգության» խմբակցության պատգամավոր Անահիտ Բախշյանի համոզմամբ, կրթական լիազորված մարմինը բոլոնյան փոփոխությունները չյուրացնելով է փորձում հրամցնել հասարակությանը: «Ազատ դեմոկրատներ» կուսակցության փոխնախագահ, դասախոս Անուշ Սեդրակյանն էլ ցանկություն հայտնեց. «Ուզում եմ, որ ֆորմալ բարեփոխումները անցնեն իրական փուլի»: ՀԱԿ կրթության եւ գիտության հանձնաժողովի համակարգող Սամվել Կարաբեկյանը խրախուսեց մեր երկրի մասնակցությունը բոլոնյան գործընթացին, բայց ափսոսաց, որ կրթական հարցեր քննարկելիս գլխավոր շահառուներ ուսանողները եւ դասախոսները մասնակցություն չեն ունենում:
Կարդացեք նաև
