Այսօր Հայաստանի կառավարության ընդունելությունների տանը մեկնարկած ԱՊՀ անդամ-պետությունների երկաթուղային տրանսպորտի խորհրդի 55-րդ նիստի բացման ժամանակ ՀՀ վարչապետ Տիգրան Սարգսյանն անդրադառնալով մեր երկրի այս տարվա տնտեսական ցուցանիշներին՝ տեղեկացրել է, որ առաջին 9 ամիսների ընթացքում մեր երկրում արձանագրվել է 5 % տնտեսական աճ, ինչը պայմանավորված է գործընկեր պետությունների հետ առեւտրաշրջանառության մակարդակի բարձրացմամբ եւ կառավարության տնտեսական քաղաքականությամբ: Նշելով, որ Հայաստանի արտաքին առեւտրաշրջանառության մակարդակն այս տարվա առաջին 8 ամիսների ընթացքում՝ նախորդ տարվա նույն ժամանակահատվածի համեմատությամբ, բարձրացել է 25. արտահանումը՝ 30, իսկ ներմուծումը՝ 17 %-ով, Տիգրան Սարգսյանը նշել է, որ այդ աճը նաեւ երկաթուղային բեռնափոխադրումների ավելացման շնորհիվ է:
Ինչպես հայտնում են ՀՀ կառավարության Տեղեկատվության եւ հասարակայնության հետ կապերի վարչությունից, Տիգրան Սարգսյանը կարեւորելով երկաթուղային տրանսպորտի զարգացման գործում ԱՊՀ երկրների միջեւ համագործակցության խորացումը՝ նշել է. «Մեր երկրի հարավը մյուս ուղղություններին կապող երկաթգծի կառուցման ծրագիրը հանդիսանում է կառավարության ծրագրային առաջնահերթություններից եւ ռազմավարական խնդիրներից մեկը: Այժմ մեր առջեւ է ծառացած երկաթուղային տրանսպորտի միջոցով ուղեւորների եւ բեռների տեղափոխությունների մակարդակի բարձրացման խնդիրը, որին էլ նպատակաուղղված են իրականացվող միջոցառումները»:
ԱՊՀ անդամ-պետությունների երկաթուղային տրանսպորտի խորհրդի 55-րդ երկօրյա նիստում խորհրդի անդամները կքննարկեն նախորդ նիստում ընդունված որոշումների կատարման ընթացքին, գնացքների երթեւեկության 2012-2013 թվականների նորմատիվներին, երկաթուղային ադմինիստրացիաների միջեւ փոխադարձ հաշվարկների կարգին, ինչպես նաեւ միջազգային հաղորդակցությունում բեռնափոխադրումների սակագնային քաղաքականությանը վերաբերող հարցեր:
