Երեկ հաշմանդամություն ունեցող մարդիկ «Մատչելի շրջապատ» խորագրով բողոքի ակցիա էին կազմակերպել: Նրանք Հանրապետության հրապարակից երթով գնացին Երեւանի քաղաքապետարանի շենք՝ ցույց տալով, որ իրենք ստիպված են սայլակներով ու ոտքով գնալ, քանի որ իրենց համար չափազանց անհարմար է քաղաքային տրանսպորտից օգտվելը: Հաշմանդամներին միացած Մարդու իրավունքների պաշտպան Կարեն Անդրեասյանը փորձել է երթի մասնակիցներից մեկին անվասայլակով բարձրացնել երթուղային որեւէ տրանսպորտ, սակայն դա անգամ նրանից է մեծ դժվարություն պահանջել: Արդեն քաղաքապետարանի շենքի դիմաց նրանց դիմավորել է քաղաքապետարանի տրանսպորտի վարչության պետ Հենրիկ Նավասարդյանը: Հաշմանդամություն ունեցող մարդկանց «Ունիսոն» հ/կ-ի ղեկավար Արմեն Ալավերդյանը «Առավոտի» հետ զրույցում հայտնեց, որ պարոն Նավասարդյանն էլ է ընդունել, որ խնդիրն իսկապես լուծում է պահանջում եւ շուտով քաղաքում կլինեն այնպիսի երթուղայիններ, որոնք մեխանիկական միջամտությամբ կհարմարեցվեն հաշմանդամություն ունեցող անձանց համար:
