Այսօր Կամերային երաժշտության տանը խմբերգային երաժշտության կատարումներով մեկնարկեց Հայկական երաժշտական համաժողովի կազմակերպած փառատոնը՝ նվիրված ՀՀ անկախության 20-ամյակին:
1994թ. հիմնված այս հասարակական կազմակերպությունը տարիների ընթացքում ստեղծագործական կապեր է հաստատել Ռուսաստանի, Բելգիայի, Հունգարիայի, Բուլղարիայի, Վրաստանի երաժիշտների հետ, թողարկել CD, հրատարակել գրականություն, որոնցում տեղ են գտել համաժողովի անդամներ Էդ. Միրզոյանի, Լ. Չաուշյանի, Ե. Երկանյանի, Ռ. Սարգսյանի, Մ. Վարդազարյանի, Ա. Կարապետյանի, Դ. Սաքոյանի, Ս. Զաքարյանի, Կ. Պետրոսյանի, Վ. Բաբայանի երկերը: Համաժողովի նախագահ Լեւոն Չաուշյանը ասուլիսում հույս հայտնեց, որ փառատոնը բեկումային կլինի:
Զարմանալի էր մի բան՝ ինչպե՞ս կարելի է ՀՀ անկախության 20-րդ տարեդարձին նվիրված Երաժշտական համաժողովի բացման օր ընտրել հոկտեմբերի 27-ը, երբ տարիներ առաջ այդ օրը գլխատվել է անկախ Հայաստանի կառավարությունն ու օրենսդիր մարմինը:
Սամվել ԴԱՆԻԵԼՅԱՆ
