ՌԴ էկոնոմիկայի եւ զարգացման նախարարությունը բացասական եզրակացություն է ներկայացրել Պետդումայում Կոմունիստական կուսակցության պատգամավորներ Ալեքսանդր Կուլիկովի եւ Վլադիմիր Նիկիտինի հեղինակած օրինագծի վերաբերյալ, որով պետական պաշտոնյաները կարող են պետբյուջեի հաշվին մեկ միլիոն ռուբլին գերազանցող արժողությամբ ավտոմեքենա գնել միայն կառավարության համաձայնությամբ: Այդ մասին հաղորդում է Lenta.ru-ն:
Կոմունիստ պատգամավորները կարծում են, որ պետական գնումների մասին համապատասխան օրենսդրությունում իրենց առաջարկած փոփոխությունների արդյունքում պետական միջոցներն ավելի ռացիոնալ կծախսվեն: Նախարարությունում կոմունիստների հետ համաձայն չեն: «Թանկարժեք մեքենաների գնումը, նկատի ունենալով դրանց ավելի երկար ժամանակ շահագործելու հնարավորությունը, որոշ դեպքերում կարող է բյուջետային ավելի քիչ միջոցներ պահանջել, քան` հաճախակի վերանորոգման եւ էժանագին տեխնիկան փոխարինելու դեպքում»,- ասված է օրինագծի վերաբերյալ նախարարության եզրակացության մեջ:
Բացի այդ, գերատեսչության կարծիքով, մեկ միլիոն ռուբլին «հարաբերական բնույթ է կրում»: Փաստաթղթում նաեւ նշվում է, որ նման փոփոխությունները համալիր խնդիրը չեն լուծում, քանի որ պետպաշտոնյաները գնում են ոչ միայն ավտոմեքենաներ, այլեւ` կահույք, տեխնիկա եւ այլն:
Կարդացեք նաև
