Երեկ Հանրային խորհրդի կրոնի, սփյուռքի եւ միջազգային ինտեգրման ՀՀ պատմական-ազգային արժեքների, հուշարձանների պահպանության, պատկանելության եւ օգտագործման խնդիրների ենթահանձնաժողովի նիստում մերժվեց դրամի խորհրդանիշի հեղինակ Կարեն Կոմենդարյանի ներկայացրած` Ազգային դրամի զգոսայգի ստեղծելու գախափարը: Կոմենդարյանը պատկերացնում է, որ այգում գտնվող ջրավազանի մեջ, այլ երկրների օրինակով, զբոսաշրջիկները կարող են նաեւ մետաղադրամներ նետել:
Ենթահանձնաժողովի նախագահ Ժասմին Ասրյանը անընդունելի է համարում առաջարկը. «Ենթահանձնաժողովն անընդունելի է համարում առաջարկը` հաշվի առնելով այն հանգամանքները, որ դրամի անվան տակ ներկայացվում են ոչ թե ազգային դրամները, այլ ԿԲ-ի կողմից թողարկված հուշադրամները: Վտանգվում է պուրակի գոյությունը, քանի որ ժամանակի ընթացքում այն կարող է դառնալ անայցելելի, հնարավոր է՝ հետագայում կհայտնվի ԿԲ-ի ենթակայության ներքո: Անընդունելի է նաեւ այն, որ զբոսայգին ոչ թե երեւանցիների համար է, այլ զբոսաշրջիկների»: Որոշմանը դեմ քվեարկեցին ենթահանձնաժողովի անդամներից 17-ը, կողմ` 3-ը, եւ մեկը ձեռնպահ էր:
Ինչպես նշեց ՀՀ առեւտրաարտադրական պալատի տեղեկատվության վերլուծության բաժնի պետ Ասքանազ Աբրահամյանը, դրամը պետության խորհրդանիշ է, հետեւաբար` այն կներկայացնի միայն 20 տարվա պատմություն: «Ուրիշներն իրենց կեղտը փլավի տեղ են ծախում, իսկ մենք դա չենք կարողանում»:
Իսկ կոմպոզիտոր Ստեփան Բաբա-Թորոսյանի կարծիքով` ազգային արժեքները կարելի է ներկայացնել գեղանկարների կամ քանդակների տեսքով, ոչ թե` դրամի: «Այնքան ենք խեղճացել, որ Գառնին ներկայացնենք հուշադրամի՞ վրա»:
Կարդացեք նաև
Ինչպես մեկնաբանեց Կոմիտաս վարդապետը, դրամն Ավետարանում ներկայացված է «Մամոնա» բառով. «Ոչ թե դրա՛մը պետք է լինի համազգային արժեք, այլ լեզուն»: Հոգեւորականը նաեւ հավելեց, որ «Ազգային արժեքն այն է, ինչը արժեւորվում է համայն հանրության կողմից: Դրամներով տուրիզմի հեղեղ չի սպասվի: Հետաքրքիր գաղափար է, բայց ոչ առաջնային»:
ՀՀ հանրային խորհրդի անդամ Աշոտ Մանուչարյանը նույնպես դեմ եղավ առաջարկին. «Փորձ է արվում ազգային արժեքների համատեքստում ներկայացնել ժամանակակից հուշամեդալները»:
Պատմական գիտությունների թեկնածու Սուրեն Սարգսյանը գաղափարին կողմ է, տեղի ընտրությանը` դեմ:
Կ. Կոմենդարյանի խոսքերով` ինքը մի կողմից ուզում է ներկայացնել ազգային արժեքները, մյուս կողմից` զարգացնել գեղեցիկ ավանդույթը. «Մետաղադրամ նետելը նշանավոր փաստ կլինի յուրաքանչյուրի կյանքում»:
Հանրային խորհրդի կրոնի, սփյուռքի եւ միջազգային ինտեգրման ՀՀ պատմական-ազգային արժեքների, հուշարձանների պահպանության, պատկանելության եւ օգտագործման խնդիրների ենթահանձնաժողովի կայացրած որոշումը կներկայացվի Հանրային խորհրդին` այն հաստատելու համար: Գալիք նիստը նախատեսված է մյուս շաբաթ:
ԼՈՒԻԶԱ ՍՈՒՔԻԱՍՅԱՆ
