ՀՀ տարածքային կառավարման նախարարի հետ երկօրյա այցով Ղարաբաղ մեկնելուց առաջ Տավուշի մարզպետ Արմեն Ղուլարյանը մարզի քաղաքապետերի հետ հանդիպել է եռօրյա աշխատանքային այցով Հայաստանի Հանրապետություն եկած Ռումինիայի Պիտեշտ, Ֆոկշան, Ռոման, Գեռլա, Դումբրավեն, Ֆրումոասա քաղաքների քաղաքապետեր Թուդոր Պենդիուկին, Բոգդան Մատիշանին, Լաուրենցիու Լեորեանուին, Օվիդիու Դրագանին, Ջորջետա Իրիմիեին, Տիբոր Ֆերենցին:
Տավուշի մարզպետարանից տեղեկացանք, որ հայ եւ ռումին համայնքապետերը խոսել են համագործակցության հնարավոր ոլորտներից, քաղաքների միջեւ բարեկամական կապեր հաստատելու հնարավոր տարբերակներից, հայկական Տավուշի եւ ռումինական Արջես տարածաշրջանի միջեւ գործնական կապեր հաստատելու հեռանկարից:
Ռումինիայի քաղաքապետերը ասել են, որ իրենց համար մեծ պատիվ է լինել Հայաստանում, քանի որ հայ ժողովուրդը մեծ ավանդ ունի իրենց քաղաքների կառուցման ու զարգացման գործում: Գեռլա եւ Դումբրավեն քաղաքները 18-րդ դարի սկզբին հիմնել են հենց հայերը եւ դրանք երկար ժամանակ կառավարվել են հայկական օրենքներով: Այսօր այս քաղաքներում առկա է հայկական հարուստ մշակութային ժառանգություն` քաղաքային հոգեւոր եւ աշխարհիկ շինություններ, արվեստի գործեր, գիտապատմական հետաքրքրություն ներկայացնող արժեքավոր արխիվներ:
