NEW
Վերջերս լրացան աստղագիտության երկու երախտավորների հոբելյանները` աստղագետ Վահե Օսկանյանի 90-ամյակը եւ նշանավոր կոնստրուկտոր Բագրատ Իոաննիսյանի 100-ամյակը: Այդ առիթներով Բյուրականի աստղադիտարանում օրերս կազմակերպվել էր սեմինար: Առաջին կեսը նվիրված էր Վահե Օսկանյանին, ով Բյուրականի աստղադիտարանի կարեւորագույն ուղղություններից մեկի` փոփոխական աստղերի ուսումնասիրության առաջատարներից էր: Նրա մասին մանրամասնորեն պատմեց որդին` նույնպես աստղագետ Արա Օսկանյանը, անդրադառնալով Վահե Օսկանյանի կյանքին եւ գիտական ժառանգությանը: Այնուհետեւ հիշողություններով եւ ելույթներով հանդես եկան աստղադիտարանի աշխատակիցներ Լիդիա Երաստովան, Սուսաննա Հակոբյանը, Լյուդվիկ Բաղյանը, Արեգ Միքայելյանը, Աշոտ Ղարիբջանյանը, Հովհաննես Պիկիչյանը եւ Հայկ Հարությունյանը: Հոբելյանական սեմինարի երկրորդ կեսը նվիրված էր Բագրատ Իոաննիսյանին, որի ղեկավարությամբ պատրաստվել են Խորհրդային Միության խոշորագույն աստղադիտակները: Տիգրան Մովսիսյանը պատմեց Ռուսաստանի հատուկ աստղադիտարանում Բ. Իոաննիսյանի 100-ամյակին նվիրված վերջերս տեղի ունեցած խորհրդակցության մասին: Այնուհետեւ ցուցադրվեց նույն աստղադիտարանի նախաձեռնությամբ պատրաստված Իոաննիսյանին նվիրված շարժանկարը: Վերջում նրա մասին հիշողություններով ելույթ ունեցան Էդուարդ Խաչիկյանը եւ Լյուդվիկ Բաղյանը:
