Թուրքիայի Իզմիթ քաղաքում ընթացող մինչեւ 16 տարեկանների շախմատի համաշխարհային օլիմպիադայում Հայաստանի հավաքականը, որ նախորդ օլիմպիադայի հաղթողն է, երկրորդ անընդմեջ հաղթանակը տոնեց՝ 4:0 «չոր» հաշվով պարտության մատնելով Մոլդովայի թիմին եւ առավոտյան մրցահերթից հետո 7,5 միավորով ստանձնեց մրցաշարային աղյուսակի առաջատարի դերը: Հաղթանակն ըստ խաղատախտակների հերթականության կերտեցին Կարեն Գրիգորյանը, Հովհաննես Գաբուզյանը, Տիգրան Հարությունյանը եւ Արման Միքայելյանը: Հիշեցնենք, որ մեր տղաները մեկնարկային տուրում 3,5:0,5 հաշվով պարտության էին մատնել «UAE-Team-A»-ին: Մրցակարգով երեկ երեկոյան կայացավ նաեւ երրորդ տուրը, որում մարզիչ Արսեն Եղիազարյանի սաներն ուժերը չափում էին 2-րդ տեղում ընթացող Հնդկաստանի իրենց հասակակիցների հետ:
