Երեկ Հայաստանի Հանրապետության Սահմանադրական դատարանը ՀՀ մարդու իրավունքների պաշտպանի դիմումի հիման վրա աշխատակարգային որոշմամբ քննության է ընդունել ՀՀ քաղաքացիական օրենսգրքի 1087.1 հոդվածի՝ ՀՀ Սահմանադրության 14-րդ հոդվածին, 27-րդ հոդվածի 1-ին, 2-րդ եւ 3-րդ մասերին եւ 43-րդ հոդվածին համապատասխանության հարցը որոշելու վերաբերյալ գործը:
Սահմանադրական դատարանը որոշել է հետաձգել այլ գործերի քննությունը եւ սույն գործի դատաքննությունը նշանակել է նոյեմբերի 15-ին: Որոշել է նաեւ գործի դատաքննությունն անցկացնել բանավոր ընթացակարգով: ՀՀ ՍԴ մամուլի ծառայությունից տեղեկացրին, որ «Սահմանադրական դատարանի մասին» ՀՀ օրենքի 68-րդ հոդվածի 4-րդ մասի համաձայն՝ սույն գործով որպես պատասխանող կողմ է ներգրավվել ՀՀ Ազգային ժողովը:
