«ՓՈՂՈՑԻ ԱՂՄՈՒԿԸ ՉԻ ՆՇԱՆԱԿՈՒՄ ՔԱՂԱՔԱԿԱՆ ՊՐՈՑԵՍ»

Վստահ է ԱԺ ՀՅԴ խմբակցության քարտուղար Արտաշես Շահբազյանը

– Ներքաղաքական կյանքում կարծես հերթական թվացյալ անդորր է հաստատվել, փաստորեն ստացվում է, որ երբ ՀԱԿ-ը հավաքում է վրանները եւ հանրահավաքներ չի անցկացնում, մյուս ընդդիմադիր ուժերը այդ ազատված հրապարակը չեն էլ փորձում օգտագործել, իրենք էլ իրենց հերթին հանրահավաքներ անցկացնել. չե՞ք զգում, որ մի տեսակ հանձնել եք քաղաքական դաշտը եւ ձեռքներդ ծալած սպասում եք, թե ՀԱԿ-ն էլ ի՞նչ կանի:
– Իսկ Դուք ինչո՞ւ եք կարծում, որ քաղաքական պրոցեսներ ասածը միայն հրապարակն է, եւ մենք էլ դարդ ու ցավ չունենք՝ ապրում ենք ՀԱԿ-ի հոգսերո՞վ:
– Ուրեմն ինչո՞ւ մյուս ընդդիմադիր ուժերը բավականաչափ ակտիվ չեն:
– Մի մտայնություն կա, որ այս երկիրը սկսեց փոխվել հանրահավաքներով, եւ մի ընդհանուր սխալ պատկերացում կա, որ եթե կա հանրահավաք, եթե կա փողոցի աղմուկ, ուրեմն կա քաղաքական պրոցես, եւ եթե դա չկա, չկա նաեւ քաղաքական պրոցես: Իրենք դրան սովոր են, որովհետեւ իրենցը ընդհանրապես հրապարակային գործունեություն է, բայց հո միայն դրանով չէ: Չկա՞ն ներքին գործընթացներ, իհարկե՝ կան, կարծես թե բոլորը քայլ-քայլ նախապատրաստվում են ընտրությունների, նոր ուժեր են մեջտեղ գալիս, նոր համախմբումների նշաններ են երեւում, հայտնի չի, ի վերջո, ի՞նչ ֆորմատով կոալիցիոն ուժերը կմասնակցեն ընտրություններին: Կարելի է ասել, որ շատ դեպքերում դեռ չկան վերջնական հստակեցումներ, բայց հիմա, այս պարագայում ասել, թե պրոցես չկա, ճիշտ չի լինի. ինքս այդ տեսակետին համաձայն չեմ:
– Կոնկրետ Դաշնակցությունը ի՞նչ խորքային պրոցեսների մեջ է, դուք ո՞ւմ հետ եք բանակցում ապագա ընտրություններում միասին կամ առանձին գնալու շուրջ:
– Թեեւ ես ԳՄ անդամ չեմ եւ ամբողջովին չեմ տիրապետում ինֆորմացիային, բայց, կարծեմ, այդ կարգի քննարկումներ այս պահին դեռեւս գոյություն չունեն: Սովորաբար մենք գնացել ենք միայնակ, դա ենք գերադասել, կարծես թե, եթե չեմ սխալվում, առ այսօր ընդհանուր տրամադրությունը այդպես էլ կա: Բայց քաղաքական պրոցեսներ են, չի բացառվում, որ նաեւ Դաշնակցությունը կարող է ինչ-որ միավորումների մաս կազմել, եթե իսկապես նման ազգային առողջ ուժեր մեջտեղում լինեն: Համենայնդեպս, մեկ խնդրի շուրջ մենք ցանկանում ենք համագործակցություն, եւ այդ խնդիրը ընտրական իրավունքի պաշտպանության մեր շարժումն է, որի մասին մենք հայտարարել ենք: Միջոցառումներ, իհարկե, լինում են, առայժմ ավելի շատ շրջաններում, միայն Երեւանով չի, ընդհանուր ներկայացնելու, տրամադրություններ ձեւավորելու խնդիր կա: Սրա կողքին նաեւ նախապատրաստական աշխատանքներ են արվում, մենք մշտապես մասնակցում ենք գաղափարական-քաղաքական ծրագրերի եւ այլն:
– Խոսակցություններ կան, որ Ռոբերտ Քոչարյանի մի քանի հարցազրույցներից հետո կստեղծվի Դաշնակցություն- ԲՀԿ-Քոչարյան միություն. Դուք հավանական համարո՞ւմ եք, որ նման մի բան կստեղծվի խորհրդարանական ընտրություններից առաջ:
– Այդ հարցին շատ ենք պատասխանել, շատ ենք բացատրություններ տվել: Ընդամենը եղել է տեսակետ, որ հնարավոր է Ռ. Քոչարյանը մտնի քաղաքական գործընթացների մեջ, իսկ այդպիսի «թեական» տեսակետների հիման վրա քաղաքական ուժը երբեք որոշումներ չի կայացնում: Նախկին անգամները մենք համագործակցել ենք, որովհետեւ մեջտեղում եղել են ծրագրեր, եթե այս ընտրություններում էլ լինի որեւէ ուժի համագործակցություն, ապա կլինի ծրագրերի շուրջ, ծրագրերի համընկնման դեպքում:
– Հանրահավաքներից մեկի ժամանակ Լեւոն Տեր-Պետրոսյանը հայտարարեց, թե Դաշնակցությունը երբեք չի դառնա Ռ. Քոչարյանի հենարանը, քանի որ գիտակցում է՝ իր այդ քայլով իր վրա կվերցնի մարտի մեկի պատասխանատվությունը. կիսո՞ւմ եք առաջին նախագահի այդ կարծիքը:
– Առաջին նախագահը սիրում է խոսել շանտաժի, պրովոկացիայի լեզվով, առիթ ունեցել ենք այս մասին էլ ասելու, որ մենք չենք առաջնորդվում իր ենթադրություններով եւ իր եզրակացություններով:
– Այսինքն՝ չե՞ք բացառում, որ կկանգնեք Քոչարյանի կողքին:
– Այստեղ այդպիսի խնդիր չկա. երբ խնդիրը քննարկված չէ, եւ «հա» ասելը, եւ «չէ» ասելը ճիշտ չէ, դրա համար էլ ես հիմա վստահորեն «չէ» չեմ ասում, եթե այդպես ասեմ, դուք կենթադրեք, որ եղել է այդ հարցի քննարկում, մինչդեռ նման քննարկում չի եղել, ուրեմն՝ ոչ «Չէ» եւ ոչ էլ «Հա»:
– Կոալիցիայի հավանական պառակտման մասին Ձեր կարծիքը. հնարավոր համարո՞ւմ եք, որ ԲՀԿ-ն ընտրությունների շեմին դուրս գա կամ միայնակ գնալու իր պնդումների պատճառով հեռացվի կոալիցիայից:
– ԲՀԿ-ն առ այսօր հստակորեն ասել է, որ առանձին է գնալու ընտրությունների, եւ այն, ինչ մենք տեսել ենք, ավելի ընդդիմադիր կեցվածքի մասին է խոսում: Եթե ասում են, թե առանձին են գնալու, ուրեմն հավանականը դա է: Նաեւ ՕԵԿ ներկայացուցիչն ասաց, թե իրենք առանձին կգնան: Գուցե այս դեպքում մարտավարությունը կփոխվի: