ՀՀ առաջին նախագահ Լեւոն Տեր-Պետրոսյանը երեկ հանդիպել է Վերակառուցման եւ զարգացման եվրոպական բանկի տնօրենների խորհրդի պատվիրակության հետ՝ Ժերոմ Բակոնինի, Կուրտ Բայերի, Օլե Բլոնդալի, Ջանլուկա Գրանդիի, Օլե Հովլանդի, Հերբերտ Յունկի, Յան Մաասի եւ Պեդրո Մորիոնիի մասնակցությամբ: ՀԱԿ-ի տարածած հաղորդագրության համաձայն, հանդիպման ընթացքում նախագահ Տեր-Պետրոսյանը ներկայացրել է Հայաստանի տնտեսական բնագավառում տիրող վիճակը, առկա մարտահրավերներն ու զարգացման խոչընդոտները, ինչպես նաեւ դրանք հաղթահարելու՝ Հայ ազգային կոնգրեսի մոտեցումներն ու պատկերացումները: Առաջին նախագահը մասնավորապես նշել է, որ տնտեսության զարգացման հիմնական խոչընդոտներն են ինչպես անբարենպաստ արտաքին գործոնները, այնպես էլ երկրի ներսում տիրող համակարգային կոռուպցիան, մենաշնորհների առկայությունը, իրավական պաշտպանության հնարավորության բացակայությունը եւ ժողովրդավարական ազատությունների բացակայությունը: Նախագահ Տեր-Պետրոսյանն անդրադարձ է կատարել նաեւ հայ-թուրքական հարաբերությունների եւ ղարաբաղյան հակամարտության կարգավորման հեռանկարներին:
