Երեկ «Նորաշեն 2007» սպառողական կոոպերատիվից մի խումբ խաբված բնակիչներ ՀՀ նախագահի նստավայրի առաջ բողոքի ակցիա էին կազմակերպել՝ ընդդեմ ՀՀԿ-ական պատգամավոր Հերմինե Նաղդալյանի: «Հերմինե Նաղդալյան, հե՛տ տուր մեր բնակարանները», «Հերմինե Նաղդալյանը կանգնած է տոկոսչիների կողքին» բովանդակությամբ ցուցապաստառները պարզած՝ բնակիչները ՀՀ նախագահ Սերժ Սարգսյանին հորդորում էին աջակցել՝ պատգամավորից հետ ստանալու իրենց քրտինքով վաստակած բնակարանները, որոնք ինչ-որ ապօրինի ճանապարհներով հայտնվել են Հ. Նաղդալյանի ամուսնու՝ Դավիթ Բեգլարյանի ձեռքում: Դ. Բեգլարյանը, որը ներկայումս զբաղեցնում է Էջմիածնի հարկայինի պետի պաշտոնը, այդ շենքից ձեռք է բերել 14 բնակարան: Ցուցարարների ներկայացմամբ, բնակարանների մի մասը վերադարձնելու համար պարոն Բեգլարյանը բնակիչներից պահանջել է $15-20 հազար: Իսկ 8 բնակչի տուն դեռեւս նրա մոտ է: «Առավոտի» հետ զրույցում ցուցարարները պատմեցին, որ շուրջ 8 ամիս տիկին Նաղդալյանն իրենց «քթից բռնած» ման է տալիս՝ խնդրելով աղմուկ չբարձրացնել եւ իր անունը չշահարկել, փոխարենը խոստանալով հետ տալ բնակարանները, սակայն. «Հասկացանք, որ դա ընդամենը փափուկ բարձ է, եւ որ նա պարզապես փորձում է ժամանակ շահել իր օգտին հարցը լուծելու համար»:
