![\"\"](\"https://www.aravot.am/2011/aravot_arm/October/5/p21.jpg\")
![\"\"](\"https://www.aravot.am/2011/aravot_arm/October/5/p22.jpg\")
Հոկտեմբերի 5-ին Այրում քաղաքի մոտ, սողանքի վայրում որոնողափրկարարական աշխատանքները շարունակվում էին: Դրանց մասնակցում էին Տավուշի, Լոռու, Գեղարքունիքի , Արագածոտնի մարզերի փրկարարները, նաեւ Նոյեմբերյանի սահմանապահ զորամասի զինվորներ:
Արտակարգ իրավիճակների նախարարության փրկարար ծառայության փոխտնօրեն Վրեժ Գաբրիելյանը հայտնեց, որ հոկտեմբերի 4-ին զինվորական ուղղաթիռի եւ երկաթուղային «կռունկի» միջոցով սողանքի վայրից տարհանվել է 9 մարդատար եւ 1 բեռնատար մեքենա, իսկ հոկտեմբերի 5-ին` 2 բեռնատար եւ մեկ շինարարական «կռունկ»: Աշխատանքները շարունակվում են:
![\"\"](\"https://www.aravot.am/2011/aravot_arm/October/5/p20.jpg\")
Իսկ ահա անհետ կորած մարդկանց հարազատներին իրենց կորուստն է մտահոգում: Անհետ կորած, Լճկաձոր գյուղի 72-ամյա բնակիչ Նորիկ Միրզոյանի տղան` Վիգենը Ռուսաստանում լսելով դեպքի մասին` շտապ վերադարձել էր: Նա դժգոհ էր որոնողական աշխատանքների դանդաղ ընթացքից, ըստ նրա փրկարարները հիմնականում մեքենաների տարհանմամբ են զբաղված: «Եթե այս փրկարարների ղեկավարին մի 20 հազար դոլար փող տանք, կորածներին գտնելու գործը թափով կընթանա»,-սրտնեղած ասաց նա:
Ակնհայտ է, որ 5 անհետ կորածներին կենդանի գտնելու ոչ մի հույս չկա: Նրանց ընդհանրապես գտնելն էլ հեշտ չի լինի, քանի որ գահավիժած հողի եւ քարի զանգվածը մեծ է:
Երեկ սողանքի գոտու սկզբնամասում կապավորները վերականգնում էին Հայաստան մտնող ինտերնետ կապի լարերը: Պետավտոտեսուչները փակել են մեքենանների մուտքը սողանքի գոտի: Մարդատար մեքենաները երթեւեկում են փլված սարի վերեւի հատվածով հին, խճապատ ճանապարհով: Խոշոր բեռնատարներն էլ երթեւեկում են Նոյեմբերյան-Իջեւան ճանապարհով:
