![\"\"](\"https://www.aravot.am/2011/aravot_arm/October/4/p11.jpg\")
«Աշնանային ռիթմեր» պայմանական խորագրով ցուցահանդես բացվեց օրերս Երեւանի ժամանակակից արվեստի թանգարանում: Գեղանկարչուհի Հասմիկ Սեւոյանը ներկայացել էր 10-ամյա ստեղծագործական ուղին ներկայացնող ինքնատիպ գործերով: Դրանով էր պայմանավորված ցուցադրվող ստեղծագործությունների ժանրերի ու շարքերի բազմազանությունը: 5 տարի առաջ ավարտած «Ներկայացում», «Թատրոն», «Զրույց» գրաֆիկական շարքերից հետո, ավելի «հասուն» գործեր էլ էին ցուցադրված՝ «Սպիտակի վարիացիաներ», «Կապույտի մեջ» եւ այլն: «Մեծանում ենք, հասունանում, փոխվում է ամեն ինչ (ոճերի տարբերությունը նկատի ունի-Զ. Ա.), կյանքում պատահած վատ բաները վրձնիս վրա չեն ազդում, գնալով գունավորվում են, գնալով լուսավորվում են կտավներս»,-ասում է Հ. Սեւոյանը: Ցուցահանդեսին ներկա արվեստաբաններից մեկի խոսքով, նկարչուհին գտնում է գեղարվեստական այնպիսի միջոցներ, որոնք օգնում են իրեն ապրել այսօրվա ռիթմի մեջ: Ըստ անվանի դաշնակահարուհի Սվետլանա Նավասարդյանի. «Հասմիկը ուրույն նկարչուհի է, ուրույն աշխարհ ունի, որը գնում բախվում է մեծ աշխարհին ու հետ է դառնում իր պոետիկ նվաճումներով հանդերձ: Տարիների հետ նորանոր աշխարհներ են բացվում, նոր դռներ ու պատուհաններ՝ այս սքանչելի նկարչուհու արվեստում: Ժամանակի հետ այն ավելի հետաքրքիր է դառնում եւ ինձ շատ հոգեհարազատ»:
