Բաքվում ընթացող սիրողական բռնցքամարտի աշխարհի առաջնության երրորդ օրը Հայաստանի հավաքականը նոր կորուստ տվեց: Մինչեւ 81 կգ քաշային կարգում Արթուր Խաչատրյանը մեկնարկային մենամարտում պարտվեց Իրանի ներկայացուցիչ Էհշան Ռուզբահանիին: Սա ռինգում մեր թիմի երկրորդ անընդմեջ պարտությունն էր: Անդրադառնալով պարտություններին՝ մեր պատվիրակության ղեկավար, ՀԱՕԿ-ի փոխնախագահ Դերենիկ Գաբրիելյանն ասել է, թե դրանցում մրցավարական կողմնակալություն չի եղել. «Նրանք իսկապես պարտվեցին եւ հիմա մարզիչների ու բոլորիս խնդիրն է՝ անել այնպես, որպեսզի այս անհաջողությունները չանդրադառնան մեր մյուս, համեմատաբար ավելի ուժեղ եւ փորձառու բռնցքամարտիկների՝ Հովհաննես Դանիելյանի, Վլադիմիր Սարուխանյանի, Հրաչիկ Ջավախյանի, Սամվել Մաթեւոսյանի եւ Անդրանիկ Հակոբյանի վրա»,- տեղեկացրել է Դ. Գաբրիելյանը «Շանթ» հեռուստաընկերությանը:
Երեկ պայքարն սկսեցին մինչեւ 69 կգ քաշայինները: Հայաստանը ներկայացնում էր Սամվել Մաթեւոսյանը:
