Երեկ Շիրակի մարզի ընդհանուր իրավասության դատարանում սկսվեց ԱԺ փոխնախագահ Սամվել Բալասանյանի որդուն՝ Միսակ Բալասանյանին պատկանող գարեջրի գործարանի անցակետի դիմաց այս տարվա փետրվարի 24-ին տեղի ունեցած արյունալի կռվի պատճառով հարուցված քրգործի դատաքննությունը: Հիշեցնենք, որ կռիվը տեղի էր ունեցել օրը ցերեկով՝ Բալասանյանի թիկնապահների եւ գարեջրի գործարանի բանվորներից մեկի՝ Ալբերտ Սահակյանի եղբայրների միջեւ, որն ավարտվել էր դանակահարությամբ. հիվանդանոց տանելու ճանապարհին մահացել էր թիկնապահներից մեկը՝ Արթուր Առաքելյանը, մյուսը՝ Վարդան Ասատրյանը, որովայնի հատվածում ծանր վնասվածքներ էր ստացել: Գործով մեղադրյալներ են ճանաչվել 5 մարդ, որոնցից 3-ը Սահակյան եղբայրներն են: Նրանցից ամենածանր մեղադրանքը առաջադրվել է 25-ամյա Արմեն Սահակյանին, ով եւ դանակահարել էր թիկնապահին: Ինչո՞ւ է ծագել վիճաբանությունը, ըստ Ալբերտ Սահակյանի դատարանին տված ցուցմունքի՝ գարեջրի գործարանի տնօրինությունը իրենց 3 ամիս աշխատեցրել է՝ առանց աշխատավարձ տալու, իրենք էլ տրանսպորտի փող չեն ունեցել, հետեւաբար եւ վրեժ լուծելու նպատակով լաբորատորիայի փականներ են գողացել ու հաջորդ օրը հետ վերադարձրել: Ըստ Արմեն Սահակյանի էլ՝ թիկնապահները իրեն ներս չեն թողել, կռիվ են սարքել, զենք հանել, որի պատճառով էլ ինքը դիմել է «ինքնապաշտպանական միջոցի»՝ թափահարել է դանակը: Արդյունքում մահացել է թիկնապահը: «Ես ինձ լիովին չեմ արդարացնում, արդար չեմ, բայց եւ չեմ ընդունում ներկայացված մեղադրանքները»,- հայտարարեց Արմեն Սահակյանը:
