![\"\"](\"https://www.aravot.am/2011/aravot_arm/September/24/p7.jpg\")
Նախորդ օրը Շիրակի մարզի ընդհանուր իրավասության դատարանում շարունակվեց Մինաս Ավետիսյանի որդի Արման Ավետիսյանի՝ Գյումրու ժուռնալիստների «Ասպարեզ» ակումբի խորհրդի նախագահ Լեւոն Բարսեղյանի դեմ ներկայացրած հայցի նախնական դատաքննությունը: Որմնանկարչի որդին դատի է տվել Լեւոն Բարսեղյանին՝ «պատիվն ու արժանապատվությունը արատավորող տեղեկությունների հերքման, հրապարակայնորեն ներողություն խնդրելու պարտավորեցման, պատճառված վնասի հատուցման պահանջով»: Հիշեցնենք, որ այս պատմությունը սկսվեց այն բանից հետո, երբ կառավարությունը որոշեց Մինասի 4 գործերը Գյումրիից տեղափոխել Է. Էռնեկյանին պատկանող «Զվարթնոց» օդանավակայան:
Հայցվորի շահերի ներկայացուցիչ Անի Խլղաթյանը «Առավոտի» հետ զրույցում տեղեկացրեց, որ իրենք ներկայացրել են նյութական պահանջ՝ 200 հազար դրամի չափով եւ 2 մլն դրամ՝ վիրավորանքի եւ զրպարտության համար: Ըստ նրա, Լեւոն Բարսեղյանը վիրավորել է նաեւ իր վստահորդի տղամարդկային արժանապատվությունը: «Ասպարեզ» ակումբի նախագահը չի ընդունում հայցը: Նշենք, որ երեկ դատական նիստի ընթացքում պարզվեց, որ asparez.am կայքում տեղադրված ոչ բոլոր հրապարակումներն են պատկանում Լեւոն Բարսեղյանի գրչին: Մանրամասները՝ հաջորդ համարում:
