ՀԱԿ Շիրակի մարզի համակարգող, գնդապետ Աշոտ Զաքարյանը երեկ, «Առավոտի» հարցին ի պատասխան, գնահատելով անկախության 20 տարիները, կարծիք հայտնեց, որ բացարձակ այս արժեքը հասարակության մի շերտի կողմից դարձել է մերժելի երեւույթ. «Սա մեծագույն ցավ է, եւ դրա հիմնական պատճառը իրականությունն է, որում այսօր հայտնվել է Հայաստան պետությունն ու հայ հասարակությունը, մի իրականություն, որտեղ բացարձակապես արժեքներ գոյություն չունեն, ամենամեծ արժեքը, ըստ էության, փողն է, նյութական միջոցներն են, աթոռը, պաշտոնը, ամեն ինչ նյութականացված է, անգամ անկախությունն են նյութականացրել: Ձեռք ենք բերել անկախություն, բայց, ցավոք, մեր հասարակության մի զգալի մասը արդեն լքել է Հայաստանը, մի զգալի մասն էլ էսօր պատրաստ է ցանկացած պահի ամենափոքր հնարավորության դեպքում լքել երկիրը, սա դժբախտություն է, մեծագույն աղետ, էս երեւույթները անկախության վրա ստվեր են գցում»,- ասում է գնդապետը` մտահոգվելով, որ արտագաղթի այսպիսի պայմաններում վաղը լրջագույն խնդիր ենք ունենալու սահմանները պաշտպանելու հարցում: «Իհարկե, կգտնվեն ընդդիմախոսներ, որոնք կասեն, որ սահմանները միայն մարդկային ռեսուրսով չեն պահում, էսօր 21-րդ դարն է, տեխնիկայի դարաշրջան, իհարկե՝ համամիտ եմ, բայց այնտեղ, որտեղ զինվոր չկա կանգնած, խոսել էդ տարածքի, էդ սահմանի հուսալիության մասին, կներեք՝ ես անհեթեթություն եմ համարում, անկախությունից 20 տարի հետո դեռեւս չունենք էն երկիրը, ինչի մասին մենք երազում էինք 88-ին, չունենք էն երկիրը, ինչի ճանապարհին մեր լավագույն ընկերներն իրենց կյանքը նվիրաբերեցին»,- ասում է ղարաբաղյան պատերազմի մասնակիցը:
