Սյունեցիք, ինչպես ողջ հանրապետությունը, սեպտեմբերի 21-ին կնշեն մեր հանրապետության 20-ամյակը: Երկրի կայացման ու սահմանների պահպանման գործում անուրանալի ու մեծ է Սյունիքի դերը: Մինչ այսօր էլ տարատեսակ միջոցառումներ են անցկացվել, հիմնականները այսօր են՝ մարզկենտրոն Կապանում: Առավոտյան՝ փողային նվագախումբը ելույթ կունենա Գարեգին Նժդեհի անվան հրապարակում, հետո հետախուզական վաշտը կցուցադրի իր ունակությունները: Այնուհետեւ այց՝ Բաղաբուրջի հուշահամալիր՝ հարգանքի տուրք արցախյան գոյամարտում զոհված ազատամարտիկների հիշատակին: Սրան կհաջորդեն մարզական փառատոնը՝ մարզադաշտում, մանկական համերգը՝ Վազգեն Սարգսյանի անվան զբոսայգում, քաղաքապետարանում կընդունեն սեպտեմբերի 21-ին ծնվածներին: Երեկոյան հանդիսավոր նիստ, որի ժամանակ կառավարական պարգեւներ կհանձնվեն անկախության կերտմանը իրենց նպաստն ունեցած տարբեր բնագավառի մասնագետների: Տոնական օրը կեզրափակվի համերգային ծրագրով ու հրավառությամբ: Կապանում կլինի նաեւ փոքրիկ շքերթ՝ առանց զինտեխնիկայի, ինչպես լինում է ամեն տարի սեպտեմբերի 21-ին:
