Վստահ է ԱԺ Հանրապետական պատգամավոր Խաչիկ Մանուկյանը
– ՀՀԿ խորհրդի անդամ, նախագահի աշխատակազմի ղեկավար Կարեն Կարապետյանի հրաժարականը շարունակում է մնալ մշուշոտ, անցել է արդեն մեկ շաբաթ, սակայն այդպես էլ պարզ չդարձավ, թե ինչու տեղի ունեցավ այդ հրաժարականը:
– Իսկապես, մեկ շաբաթից ավելի հնչում են հարցեր, թե ինչու հրաժարական տվեց Կարեն Կարապետյանը, եւ հնչում են տարբեր վերլուծություններ ու մեկնաբանություններ. հետաքրքիր է, որ այդ վերլուծություններն արվում են տարբեր դիրքերից եւ տարբեր նպատակներով: Իրականությունն այն է, որ ինձ համար տխուր է, որ տեղի ունեցավ այդ հրաժարականը. ճանաչելով Կարեն Կարապետյանին՝ ինձ համար անակնկալ չէր այս քայլը, ես ինչ-որ տեղ նաեւ ուրախ եմ, որ դա եղավ: Կարեն Կարապետյանի կարգի քաղաքական գործիչ մեր երկրում քիչ կա, եւ նրա կերպարը, գործչին հատուկ հատկանիշները, աշխատանքի ձեւերը, աշխատասիրությունը շատ կարեւոր են այսօրվա տնտեսական եւ քաղաքական դաշտի համար: Հանրապետական կուսակցության համար շատ մեծ կորուստ էր, եւ հենց այդ պատճառով էլ հարկավոր է լրջորեն վերլուծել այն պատճառները, որոնց հետեւանքում նա հրաժարական տվեց:
– Իսկ ինչո՞ւ եղավ դա, Դուք պատասխան ունե՞ք:
– Կարեն Կարապետյանը ոչնչի կարիք չունի, ինքը սոցիալական խնդիր չուներ, եւ ինձ թվում է՝ նրան չէր բավարարում այն վիճակը, որը տիրում է ոչ թե քաղաքական, այլ տնտեսական դաշտում, քանի որ դրա պատճառով առաջ գնալ չի լինում: Մինչդեռ ժողովուրդը պիտի վստահի, որպեսզի առաջ գնանք, հակառակ դեպքում՝ առաջ գնալ չենք կարող: Առաջ գնալու խնդիր ունենք, որպեսզի ժողովուրդը կարողանա վստահել, հավատալ: Այսօր այդ վստահությունը չենք տեսնում: Իսկ Կարեն Կարապետյանը իր էությամբ պետությանը նվիրված մարդ է: Ինքը ինչ-որ անձնական խնդիրներ չունի լուծելու, բիզնես անելու կամ այլ հարցեր լուծելու: Նա ամբողջ էությամբ նվիրված է այս պետությանը: Ո՞ր պետական պաշտոնյան կգնար նման քայլի, քչերը կամ՝ գրեթե ոչ ոք: Հրաժարական տալը բարձր բարոյական արժանիք է: Կարելի էր յոլա տանել, բայց ինքը յոլա տանող մարդ չէ, կարելի էր հարմարվել, շարունակել պաշտոնավարել, բայց նա այն մարդը չէ, որ հանուն պաշտոնի հարմարվեր: Մենք պետք է խնդիրը դիտենք բարոյականության դաշտում: Կարեն Կարապետյանի տնտեսական գիտելիքները եւ քաղաքական փորձառությունը հիմք են՝ նրան ցանկացած պաշտոն վստահելու, սակայն նա չի ձգտում պաշտոնների: Մարդը բարոյական բարձր արժեքներ կրող է, որն այսօր շատ է պակասում, եւ շատերը պետք է մտածեն այս մասին: Հիշում եք, ժամանակին նախարարներից մեկը հրաժարական տվեց: Այդ ժամանակ մի պահ մտածեցինք, թե ինչ-որ բան փոխվեց կամ կփոխվի, բայց դա եղավ միակ դեպքը: Կարծում եմ՝ սա քաղաքական մշակույթ է եւ արժանի է հարգանքի: Նա իր աշխատանքով ապացուցել է, որ նվիրված է պետությանը, եւ երկրի նախագահը անձամբ հայտարարեց, որ շնորհակալ է անշահախնդիր եւ նվիրված աշխատանքի համար: Անգամ հայտարարեց, թե ցանկանում է մեդալ տալ: Նախագահը սա ասաց ՀՀԿ խորհրդի ներկայությամբ: Այսինքն՝ ուզում եմ ասել՝ հարաբերությունների մասին խոսք լինել չի կարող: Այս հարթությունում ամեն ինչ բարձր մակարդակի է: Ամբողջ խնդիրը մեխանիզմների դաշտում է. խոսքը ճիշտ, մաքուր դրսեւորումների մասին է:
– Դուք եւ մի խումբ այլ պատգամավորներ համարվում եք եւ ընկերներ, եւ, կներեք, ըստ որոշ լուրերի, հովանավորվում եք Կ. Կարապետյանի կողմից: Այժմ մտավախություն չունե՞ք, որ շղթայական ռեակցիայով այդ ամենը որոշակի ձեւով կանդրադառնա նաեւ Ձեզ վրա:
– Նման մտավախություն, իհարկե, չկա, քանի որ մենք նույն թիմի անդամ ենք, եւ այդ հարցում «իմ» ու «քո» ձեւակերպումը կոպիտ եմ համարում: Անառարկելի է, որ բոլոր պատգամավորները ինչ-որ արժանիքներ ունենալով են դառնում պատգամավոր՝ եւ համամասնականով, եւ մեծամասնականով դարձածները: Եվ հենց այնպես ոչ ոք պատգամավոր չի դառնում: Ի վերջո, քվեն տալիս է ժողովուրդը, եւ ընտրողը ժողովուրդն է, իհարկե՝ լինում են որոշակի սուբյեկտիվ պահեր, բայց վերջին խոսքը ժողովրդինն է: Իսկ Կարեն Կարապետյանի ընկերները հիմնականում մեծամասնականով անցած պատգամավորներ են, որոնք իրենց ընտրատարածքներում ժողովրդից են ձայն ստացել:
– Ընդունեք, անհասկանալի է մնում, թե ինչ քայլեր են հետեւելու այդ հրաժարականին՝ կլինի կուսակցությունից դուրս գալու որոշո՞ւմ, կստեղծի նոր կուսակցությո՞ւն, թե՞ կանդամակցի մեկ այլ կուսակցության: Սրանք հարցեր են, որոնք այսօր չափազանց շատ են շրջանառվում: Դուք որեւէ տեղեկություն ունե՞ք այս ամենի մասին:
– Այլ կուսակցության անդամակցելը իրենը չէ, կարծում եմ՝ նման բան չի լինի: Մնացյալը պարզ չի:
– Ուզում եք ասել՝ նոր կուսակցություն չի՞ ստեղծելու:
– Ես արդեն ասացի՝ բացի ուրիշ կուսակցություն գնալուց, մնացած ամեն ինչ կարող է լինել:
