«Շատ համեղ գարեջուր է, իսպանակա՞ն է»,- հարցրեցի Բլանեսի՝ Իսպանիայի հայտնի Կոստա-Բրավա ափի ամենահին քաղաքի սրճարաններից մեկի մատուցողին: «Ոչ, իհարկե: Կատալոնական է, մեր տեղականն է…»,- կիսավրդովված ու ոգեւորված պատասխանեց նա: Բացօթյա սրճարանից տեսարան էր բացվում դեպի մոտակա լողափի ողջ երկայնքով հսկայական տառերով գրված՝ INDEPENCIA CATALUNYA կոչը:
![\"\"](\"https://www.aravot.am/2011/aravot_arm/September/14/p13.jpg\")
Կատալոնիայում (մայրաքաղաքը՝ Բարսելոնա) ոչ միայն բոլորը կատալոներեն են խոսում, այլեւ ցանկացած ցուցանակ ցանկացած վայրում գրված է երկու լեզվով՝ սկզբում կատալոներեն, ապա նոր՝ իսպաներեն: Կատալոներենը իսպաներենից տարբերվում է այնքանով, որքանով գրական հայերենը, ասենք, ղարաբաղյան բարբառից: Այս համեմատությունը արեց ծանոթս, որը տիրապետում է ե՛ւ ղարաբաղյան բարբառին, ե՛ւ իսպաներենին: Իսկ երբ Բարսելոնայում մի տեղացուց ճանապարհ էինք հարցնում՝ իսպաներենով, ասաց՝ «ավելի լավ է անգլերեն հարցրեք, այդ իսպանացիները կուշտ ենք», ու ձեռքով կոկորդը ցույց տվեց: Հավանաբար, կատալոնցի ազգայնականներից էր: Սակայն նրա խորհուրդը՝ խոսել անգլերեն, գրեթե անիրականանալի էր, քանի որ տեղացիների գերակշիռ մասը, այդ թվում՝ խանութների եւ սպասարկման այլ ծառայությունների աշխատակիցները, նախընտրում են անգամ զբոսաշրջիկների հետ խոսել կատալոներեն: Բայց լեզվական խնդիրները որեւէ կերպ չեն խանգարում բազմահազար զբոսաշրջիկներին վայելել Բարսելոնայի շքեղությունը եւ Միջերկրական ծովի իսպանական ափի հրաշալի բնությունը: Կիլոմետրերով ձգվող ոսկեհատիկ ավազե լողափերն անգամ ամռան վերջին-աշնան սկզբին լեփ-լեցուն էին զբոսաշրջիկներով:
![\"\"](\"https://www.aravot.am/2011/aravot_arm/September/14/p5.jpg\")
Տիպիկ կատալոնյան վիլլա:
![\"\"](\"https://www.aravot.am/2011/aravot_arm/September/14/p6.jpg\")
![\"\"](\"https://www.aravot.am/2011/aravot_arm/September/14/p7.jpg\")
Բարսելոնայի խորհրդանիշը հանդիսացող Սագրադա Ֆամիլիայի, ինչպես
նաեւ այդ տաճարի հեղինակի՝ Անտոնիո Գաուդիի մեկ այլ
աշխարհահռչակ գործի՝ «Կազա Միլայի»
մոտ մշտապես մեծ հերթեր են:
![\"\"](\"https://www.aravot.am/2011/aravot_arm/September/14/p8.jpg\")
Կատալոնիայում նույնիսկ
«Կոկա-Կոլան» է ազգային նկարագիր կրում՝ արտադրվում է «Սագրադա Ֆամիլիայի» պատկերով:
![\"\"](\"https://www.aravot.am/2011/aravot_arm/September/14/p9.jpg\")
Բլանես քաղաքի գողտրիկ անկյուններից մեկը:
![\"\"](\"https://www.aravot.am/2011/aravot_arm/September/14/p10.jpg\")
Բարսելոնայի ամենահին շուկան՝ «Բոքուերիան», նույնպես զբոսաշրջիկների սիրելի
վայրերից է: Այնտեղ, ինչպես հեքիաթներում է ասվում, «նույնիսկ ծտի կաթ կճարվի»:
![\"\"](\"https://www.aravot.am/2011/aravot_arm/September/14/p11.jpg\")
Ամեն առավոտ Կոստա-Բրավայի
առափնյա քաղաքների փողոցները մաքրվում են
նման մեքենաներով:
![\"\"](\"https://www.aravot.am/2011/aravot_arm/September/14/p12.jpg\")
Գաուդիի ոճը Բարսելոնայում եւ շրջակայքում
ամենուր է՝ հուշանվերներից սկսած, փողոցային
արտիստներով վերջացրած:
Բարսելոնայում արմավենիներ են աճում
անգամ շենքերի գլխին:
Հ. Գ. Կատալոնիայում հերթական անգամ գնահատեցի 20 տարի առաջ մեր ձեռք բերած անկախությունը:
