Գերիշխող դիրքը չարաշահելու համար Հայաստանի տնտեսական մրցակցության պաշտպանության պետական հանձնաժողովը երեկ խիստ նկատողություն տվեց «Հայաստանի էլեկտրական ցանցեր» ընկերությանը: 20 միլիոն դրամով տուգանելու նախնական որոշումը նկատողությամբ փոխարինելու քայլը հանձնաժողովի նախագահ Արտակ Շաբոյանը բացատրեց ընկերության կարգապահ աշխատանքով. «Ընկերությունն առաջին անգամ է հայտնվել մեր տեսադաշտում, բացի այդ, վարույթի ընթացքում արդեն հասցրել է վերականգնել սպառողների իրավունքները»:
Նշենք, որ Նոր Նորքի Մոլդովական ու Բագրեւանդ փողոցների բնակիչները 2 տարի շարունակ կանոնավոր լույսի կարոտով են ապրել: ՀԷՑ-ը միայն նախորդ ամիս է այս խնդիրը կարգավորել: ՀԷՑ-ի իրավաբան Վարդան Գրիգորյանը խնդիրը ուշացումով կարգավորելը բացատրեց կազմակերպչական աշխատանքների խոչընդոտով:
Նա նաեւ նշեց, որ պատշաճ ժամանակահատվածում քաղաքացիներից դիմում չեն ստացել (բնակիչները դիմում են ուղարկել 2010 թվականի մայիսին ՏՄՊՊՀ վարույթից հետո):
Ի պատասխան՝ պարոն Շաբոյանն էլ ասաց, որ որպես ոլորտում մենաշնորհային դիրք ունեցող ընկերություն, «Հայէլցանցերը» պարտավոր էր սպառողներին իրենց իրավունքների ու պարտավորությունների մասին պատշաճ ժամանակահատվածում տեղեկացնել, ինչը չի արել: Ի տարբերություն ՀԷՑ-ի, «Ֆրեշ» ընկերությունը չխուսափեց 500 հազար դրամ տուգանքից: Սուպերմարկետների ցանցին հանձնաժողովը տուգանեց քաղաքացիներին ապակողմնորոշելու համար:
Պարզվում է՝ «Ֆրեշը» ակցիայի շրջանակում ներկայացրած ապրանքը չի վաճառել գովազդում նշված գներով: Ընկերության գլխավոր հաշվապահ Հովհաննես Մալջյանը նիստի ժամանակ արդարանում էր ու բացառում, թե նման դեպք է եղել ու ասաց, թե խախտում արձանագրած քաղաքացին նախ պետք է դիմեր խանութի մենեջերին:
