«Ադրբեջանի սպառնալիքներն ուղղված են արդեն ոչ թե Հայաստանին կամ Լեռնային Ղարաբաղին, այլ միջազգային հանրությանը եւ ամենից առաջ՝ Ռուսաստանին»,- ըստ «Արմինֆո» լրատվական գործակալության՝ երեկ հայտարարել է Քրիստոնեա-դեմոկրատական կուսակցության առաջնորդ Խոսրով Հարությունյանը: Նրա կարծիքով՝ Հարավային Օսիայում հակամարտությունից հետո Հարավային Կովկասում կայունության եւ խաղաղության գլխավոր երաշխավորը Ռուսաստանն է: «Խոսել ռազմական գործողությունների վերսկսման անհրաժեշտության մասին, նշանակում է չընդունել Ռուսաստանի դերը, որի համար Ղարաբաղի իրավիճակը շատ մեծ նշանակություն ունի»,- նշել է Հարությունյանը: Հարությունյանը նաեւ ասել է, որ այժմ Ադրբեջանի հերթն է որոշակի դիրքորոշում հայտնելու, եւ Բաքվից է կախված, թե կարո՞ղ է արդյոք հակամարտության խաղաղ կարգավորումը հեռանկարային դառնալ: Նա նաեւ ընդգծել է, որ ղարաբաղյան հակամարտության կարգավորման գործում եւս մեկ՝ ոչ պակաս կարեւոր գործոն է Թուրքիան. «Ադրբեջանի հետ Թուրքիայի շփումները պետք է գրավեն Ռուսաստանի ուշադրությունը, քանի որ Հարավային Օսիայում Ռուսաստանի հակամարտությունից հետո Թուրքիան դադարել է գոհանալ տարածաշրջանային, մերձարեւելյան տերության դերով եւ հավակնում է միջազգային հարցերի կարգավորման՝ աշխարհի այլ տարածաշրջաններում»:
