Երեկ Հայաստանի Վճռաբեկ դատարանը արձագանքել է Մարդու իրավունքների պաշտպան Կարեն Անդրեասյանի նախօրեին տարածած հայտարարությանը, որով նա երեք դատավորի ներկայացրել է կարգապահական պատասխանատվության: Այդ մասին Panorama.am-ին հայտնել են Վճռաբեկ դատարանի լրատվական ծառայությունից: «Սակայն, չսպասելով ներկայացված հաղորդումներով Արդարադատության խորհրդի կողմից որոշումների կայացմանը, Մարդու իրավունքների պաշտպանը հրապարակային հաղորդագրություն է տարածել: Այսինքն՝ Մարդու իրավունքների պաշտպանը, չպահպանելով միջազգային եւ ներպետական նորմերի պահանջները, հրապարակավ հաստատված է համարել դատավորների կողմից օրենքի նորմերի ակնհայտ եւ կոպիտ խախտումներ թույլ տված լինելը՝ դրանով իսկ կասկածի տակ դնելով ոչ միայն դատավորների հեղինակությունը, այլեւ նրանց անկախությունը, բարձր պրոֆեսիոնալիզմը»: Ավելի վաղ ՄԻՊ գրասենյակի տարածած հայտարարությամբ Պաշտպանը 3 դատավորների՝ Երեմ Եսոյանին, Մասիս Ռեհանյանին ու Յուրիկ Իսկոյանին ներկայացրել է ՀՀ արդարադատության խորհրդին՝ կարգապահական պատասխանատվության ենթարկելու համար:
