Հայ ազգային կոնգրեսի 7 ակտիվիստների դեմ հարուցված քրեական գործի քննությունը Կենտրոնի քննչական բաժնից տեղափոխվել է Ոստիկանության քննչական գլխավոր վարչության ՀԿԳ վարչության վարույթ եւ գործի նախաքննությունն իրականացնելու նպատակով քննչական խումբ է ստեղծվել: Այդ մասին երեկ, «Առավոտի» հետ զրույցում ասաց ձերբակալվածների պաշտպաններից մեկը՝ Հովիկ Արսենյանը:
Արձագանքելով ՀՀ ոստիկանապետ Ալիկ Սարգսյանի՝ միջադեպի առնչությամբ երեկ արած մեկնաբանություններին, պաշտպանն ասաց, թե ոստիկանապետն իր ասուլիսում էմոցիոնալ, զայրացած հայտարարություններ արեց՝ որպես հերոսական գործողություն ներկայացնելով այն, որ միջադեպը տեւել է եւ ոստիկաններին 20 րոպե է պետք եղել խուլիգան երիտասարդներին բերման ենթարկելու համար, բայց ահա ոստիկանները դարձել են քավության նոխազ. «Ուզում եմ հարցնել, այդ ինչպե՞ս է եղել, որ 30 ոստիկանի առկայության պայմաններում 20 րոպե շարունակ գործողություններ են կատարվել, եւ ոստիկանությունն անզոր է եղել խուլիգանությունը դադարեցնելու: Եվ հաջորդը՝ ՀՀ-ում ո՞ւմ հայտնի չէ, որ բոլոր քաղաքացիներն էլ խիստ գրգռված են, նյարդային վիճակում են: Հասարակության մի մասը, որն օլիգարխների շրջապատից է, «հաբռգած» ու ցինիկ է եւ մտածում է, որ իր դեմ խաղ չկա, բայց մի մասն էլ սոցիալապես անապահով վիճակում է, ու բավական է, որ ոստիկանության որեւէ աշխատակից ընդամենը մի կայծ տա՝ քաղաքացուն կանգնեցնելու ոչ պատշաճ ձեւ կամ ոչ պատշաճ վերաբերմունք, որպեսզի քաղաքացին հունից դուրս գա: Արդյոք հենց սա չի եղել միջադեպի պատճառը»:
Հովիկ Արսենյանն անդրադարձավ տեղի ունեցած միջադեպի այլ մանրամասների եւ ՀՀ ոստիկանապետի նաեւ այլ հայտարարություններին: Այդ մասին կարդացեք հաջորդ համարում:
