![\"\"](\"https://www.aravot.am/2011/aravot_arm/August/9/p1.jpg\")
Երեկ ոստիկանության աշխատակիցները, Խաղաղ Դոնի 19 շենքի բնակիչների եւ նախկին ոստիկանների օգնությամբ, ավազակային հարձակում կատարելու պահին ձերբակալել են 2 անձի: Հիշյալ շենքն ունի 12 մուտք եւ իր երկարության պատճառով կոչվում է «զոքանչի լեզու»: «Առավոտի» տեղեկություններով, ձերբակալվել են նախկինում դատված 26-ամյա Արամ Բարսեղյանը եւ 33-ամյա «Մանախ» մականվամբ Արմեն Վարդանյանը. վերջինիս ձերբակալման պահը պատկերված է լուսանկարում: Նրանք հրազենով եւ դանակով զինված հենց շենքի մուտքի մոտ փորձել են ավազակային հարձակման միջոցով 63-ամյա Նադյա Շահինյանից հափշտակել նրա մոտ եղած 38 մլն դրամը: Մեզ հայտնի է դարձել, որ Ն. Շահինյանը աշխատում է Երկաթուղու էլցանցում որպես գանձապահ: Երբ քաղաքացիներն ու ոստիկանները փորձել են վնասազերծել զինված հանցագործներին, նրանք կրակել են իրենց հետապնդողների ուղղությամբ: Տուժած գանձապահը մարմնական վնասվածքներով տեղափոխվել է «Էրեբունի» բժշկական կենտրոն:
