![\"\"](\"https://www.aravot.am/2011/aravot_arm/August/4/p1.jpg\")
ՀԱԿ-իշխանություն երկխոսության ներկայացումը շատ ցածրորակ է, որեւէ բան չի խոստանում, անպտուղ համագործակցության վերականգնում է, երեկ լրագրողների հետ հանդիպման ժամանակ հայտարարել է ԱԻՄ նախագահ Պարույր Հայրիկյանը՝ հավելելով, թե հիմքեր չունի կարծելու, որ այդ
համագործակցությունից որեւէ բան կփոխվի: Անդրադառնալով օգոստոսի 2-ին Ազատության հրապարակում Լեւոն Տեր-Պետրոսյանի հայտարարությանը, թե երկխոսության շնորհիվ միջազգային ասպարեզում անսահմանորեն բարձրացել է Հայաստանի հեղինակությունը, Հայրիկյանը, news.am-ի մատուցմամբ, ասել է. «Միջազգային հանրության այն ներկայացուցիչները, որ գոհունակություն հայտնեցին ՀԱԿ-իշխանություն երկխոսության առիթով, մեղմ ասած՝ տհաս են: Ցանկացած երկրում Սահմանադրությունն է սահմանում երկխոսության ամբիոնը եւ կարգը, եթե Սահմանադրությունը չի գործում, այդ դեպքում պետք է այլ ամբիոն ընտրես»: Այդուհանդերձ, ԱԻՄ առաջնորդը մի հաջողություն նկատել է. «Իշխանություններն արձանագրեցին, որ իրենք լեգիտիմ չեն, քանի որ լեգիտիմ իշխանությունը պետք չուներ ամբիոններ ստեղծելու եւ շոուներ անելու»:
