Ադրբեջանի բարձրագույն ռազմական ակադեմիայի ուսանողները նամակ են ուղարկել ադրբեջանական «Մուսավաթ» թերթի խմբագրություն, որտեղ իրենց մեղադրանքներն են հնչեցնում պաշտպանության նախարար Սաֆար Աբիեւի կողմից պաշտոնեական դիրքի չարաշահման վերաբերյալ: News.am-ի մատուցմամբ, նամակում մասնավորապես արծարծվում են հետեւյալ հարցերը. «Սաֆար Աբիեւն ի՞նչ հիմքերով է յուրացրել պաշտպանության նախարարության կողմից ծառայողական նպատակներով հատկացված 1000 քմ բնակելի տարածքը եւ ավելի քան 1 հա կազմող հողատարածքը: Իսկ որտե՞ղ են ապրելու հետագա պաշտպանության նախարարները: Թե՞ Աբիեւը որոշել է ցմահ զբաղեցնել այդ պաշտոնը եւ պաշտոնեական դիրքի չարաշահմամբ ամբողջությամբ թալանել պաշտպանության նախարարությանը: Ի՞նչ փողերո՞վ է Աբիեւը կառուցում միլիոնավոր գումարներ արժեցող ամառանոցները: Թե 2000 մանաթից ավելի աշխատավարձ է ստանում, իսկ միգուցե միլիոնանոց մաղարիչնե՞ր է ստանում»:
Ինչպես հաղորդում է «Մուսավաթը», Սաֆար Աբիեւին են պատկանում Ռազմական ակադեմիայի հարեւանությամբ՝ Հասան Ալիեւ, Թեյմուր Ալիեւ եւ այլ փողոցներում գտնվող ամառանոցները, բացի այդ, նա ունի մի շարք բնակարաններ նորակառույց բազմահարկ շենքում եւ հսկայական հողատարածք: Նախարարի տիրույթների ընդհանուր արժեքը 10 միլիոն մանաթի է հասնում:
