Tert.am-ի հարցին՝ որքա՞ն ժամանակ է անհրաժեշտ ՀԱԿ-ին իշխանության գալու դեպքում սահմանադրական կարգը հաստատելու համար, «Հայկական ժամանակ» թերթի խմբագիր Նիկոլ Փաշինյանը խուսափել է կոնկրետ ժամկետների մասին խոսել. «Եթե Հայ ազգային կոնգրեսը գա իշխանության, նշանակում է՝ տեղի են ունեցել օրինական ընտրություններ: Դա արդեն նշանակում է, որ Սահմանադրության երկրորդ հոդվածով նախատեսված իրադարձությունը տեղի է ունեցել: Մնացած հոդվածները կյանքի կոչելու համար, բնականաբար, պետք է գործադրվեն առավելագույն ջանքեր»: Արդյոք «ավազակապետության» բոլոր ոլորտների բոլոր ավազակներին պատրաստվո՞ւմ եք հեռացնել աշխատանքից՝ հարցին ընդդիմադիր գործիչն ասել է. «Մենք բոլորս Հայաստանի Հանրապետության քաղաքացիներ ենք, այդ թվում՝ նաեւ նրանք, որ այսօր պետական մարմիններում են աշխատում: Նաեւ դատական համակարգում կան մարդիկ, ովքեր իրենց պրոֆեսիոնալ եւ պետական հատկանիշներով օգտակար են մեր պետությանը»,- ասել է նա՝ հավաստելով, որ ճիշտ չի լինի տարբեր աշխատանքների համար դրսից մարդիկ բերել, այլ համակարգն է պետք փոխել: «Ընդհանրապես կոնկրետ լուծումների պարագայում ես դեմ եմ խմբակային լուծումներին: Ես չեմ համարում, որ, օրինակ, Հայաստանի Հանրապետության դատական համակարգում չկա այնպիսի դատավոր, որը դեռ շանս ունի համապատասխան քաղաքական պայմանների առկայության դեպքում լինել իսկապես արդար դատավոր»,- նշել է նա:
