Շախմատի աշխարհի 2011-ի թիմային առաջնության չեմպիոն Հայաստանի հավաքականը երեկ երեկոյան պատվով վերադարձավ հայրենիք: Ինչպես հաղորդում է tert.am-ը՝ «Զվարթնոց» օդանավակայանում պատմական հաղթանակը կերտած գրոսմայստերներին դիմավորեց Հայաստանի նախագահ Սերժ Սարգսյանը: Առաջինն օդանավից դուրս եկավ հավաքականի ավագ Արշակ Պետրոսյանը, ապա հավաքականի խաղացողներ Վլադիմիր Հակոբյանը, Գաբրիել Սարգսյանը, Ռոբերտ Հովհաննիսյանը եւ Սերգեյ Մովսիսյանը:
Հայաստանի առաջատար գրոսմայստեր Լեւոն Արոնյանը մնացել էր Չինաստանում: Լեւոնն առաջիկա օրերին հանգստանալու է, ապա սկսելու է նախապատրաստվել այս տարի կայանալիք այլ կարեւոր ստուգատեսների:
Օդանավակայանից շախմատիստներն ուղեւորվեցին Ազատության հրապարակ, որտեղ տոնական համերգ էր ընթանում՝ նվիրված Հայաստանի հաղթանակին:
