«Տնտեսական մրցակցության պետական հանձնաժողովը պետք է համապատասխան որոշումներ կայացնի եւ պարտադրի, որպեսզի խոշոր բիզնեսները բաղդատվեն մասերի՝ փոքր եւ միջին բիզնեսի համար մրցակցությունն ապահովելու նպատակով»,- HayNews.am-ի փոխանցմամբ, Օշականում մտավորականների հետ հանդիպման ժամանակ երեկ ասել է ՀՀ վարչապետ Տիգրան Սարգսյանը: Վարչապետը նաեւ հավելել է. «Այսօր օբյեկտիվորեն ստեղծվել է այնպիսի իրավիճակ, երբ փոքր եւ միջին բիզնեսի ներկայացուցիչների համար ծախսատար է Վրաստանով ապրանքներ տեղափոխելը, ինչի արդյունքում նրանք չեն դիմանում խոշոր բիզնեսի հետ մրցակցությանը: Սա օբյեկտիվ հանգամանք է: Որպեսզի այդ մրցակցությունը լինի, անհրաժեշտ են այլընտրանքային ուղիներ` կապերի դիվերսիֆիկացիա եւ այլն: Հաշվի առնելով այս օբյեկտիվ հանգամանքը՝ ՏՄՊՊՀ-ն պետք է պարտադրի, որպեսզի խոշոր բիզնեսները բաղդատվեն մասերի, որը միջազգային պրակտիկայում գոյություն ունի: Կառավարությունն արդեն նման լիազորություններ տվել է հանձնաժողովին, որը վերջին շրջանում ակտիվորեն զբաղվում է այս ուղղությամբ: Կարծում եմ՝ առաջիկա երեք տարիներին մենք լուրջ փոփոխություններ կարձանագրենք այս ոլորտում»:
