Trend-ի մատուցմամբ, Իրանի իսլամական հեղափոխության պահապանների կորպուսի ուժերը կործանել են ամերկյան անօդաչու մի ինքնաթիռ, որը գտնվել է երկրի Կում գավառի օդային տարածքում: Այդ մասին հայտարարել է Իրանի խորհրդարանի ազգային անվտանգության եւ արտաքին քաղաքականության հարցերով հանձնաժողովի անդամ Ալի Աղազադե Դաֆսարին: Նա նաեւ հավելել է, թե անօդաչու ինքնաթիռը թռիչք է իրականացրել Կում գավառում տեղակայված հարստացված ուրանի գործարանի վրայով:
Պատգամավորի ասելով, թռիչքի նպատակը եղել է ԱՄՆ Կենտրոնական հետախուզական վարչության համար Ֆորդոյում միջուկային օբյեկտի գտնվելու վայրի նույնականացումն ու այլ տեղեկությունների հավաքագրումը:
Նախօրեին Իրանի ԱԳՆ պաշտոնական ներկայացուցիչ Ռամին Մեհմանպարաստը հաղորդել էր, թե Իրանը սկսել է հարստացված ուրանի գործարաններում նոր սերնդի կասետային ցենտրիֆուգների տեղադրման աշխատանքները: Նրա ասելով, Իրանն այդ մասին տեղեկացրել էր նաեւ ՄԱԳԱՏԷ-ին եւ այդ գործընթացը իրականացվել էր այդ գործակալության վերահսկողությամբ:
