![\"\"](\"https://www.aravot.am/2011/aravot_arm/July/16/p1.jpg\")
Այսօր ես Հայաստանում չեմ տեսնում իշխանություններ, տեսնում եմ միայն դրսից նշանակված ժամանակավոր վարչակազմ: Եվ այդ վարչակազմի օրակարգում չկան Հայաստանի եւ հայության ներսից ծագող հարցեր. «ԱրմԻնֆո»-ին տված հարցազրույցում կարծիք է հայտնել «Սարդարապատ» շարժման նախաձեռնող խմբի անդամ Գարեգին Չուգասզյանը: «Ընդհանրապես որտեղի՞ց ի հայտ եկավ օտարալեզու դպրոցների հարցը: Մենք չունենք այդ խնդիրը, դրա լուծման համար նախադրյալներ չկան: Հայաստանում գոյություն ունի միայն կրթության որակի բարձրացման հարց եւ անհրաժեշտություն, ու հայոց լեզուն մեղավոր չէ, որ կրթության որակն անբավարար է: Սակայն մեր հարցերը որեւէ արձագանք չեն գտնում վարչակազմի մոտ»,- նշել է նա: Այդ վարչակազմը, Գարեգին Չուգասզյանի կարծիքով, հստակ գիտի միայն մեկ բան, որ այն նշանակվում է, այլ ոչ թե ընտրվում: Հետեւաբար՝ նա հստակ կերպով կատարում է տերերի կողմից իրենց թելադրված հրամանները՝ ըստ էության, անկարող լինելով լուծել իր սեփական ժողովրդին հուզող հարցերն ու խնդիրները:
