BBC-ի մատուցմամբ, եգիպտական ոստիկանության գրեթե 700 բարձրաստիճան աշխատակիցներ, որոնք առնչություններ ունեն փետրվարյան հակակառավարական բողոքի ակցիաների ժամանակ դրանց մասնակիցների սպանություններին, պաշտոնանկ կարվեն:
Եգիպտոսի ներքին գործերի նախարար Մանսու Իսավիի ասելով, այդ միջոցառումը վերաբերելու է ոստիկանության 505 գեներալի եւ 164 ավագ սպաների: Վերջիններիս հեռացումը համակարգից՝ կսկսվի օգոստոսի 1-ին:
Երկրի վարչապետ Իսամ Շարաֆը հայտարարել է, որ ոստիկանների պաշտոնանկությունը մի մասն է այն համալիր միջոցառումների, որոնք կառավարությունը ձեռնարկում է ի պատասխան հասարակության՝ ապստամբությունը ճնշելու համար պատասխանատու անձանց նկատմամբ արդարադատություն իրականացնելու պահանջի համատեքստում:
Հիշեցնենք, որ նախկին նախագահ Հոսնի Մուբարաքի պաշտոնանկությունից հետո Եգիպտոսը ղեկավարում է զինված ուժերի գերագույն խորհուրդն ու նրա կողմից նշանակված անցումային կառավարությունը:
