«Ինձ հաճախ են հարցնում, թե որ քաղաքի նման կցանկանայիք լիներ Երեւանը: Պատասխանը միանշանակ է՝ Երեւանի նման: Որովհետեւ Երեւանը իր յուրահատկությունն ունի, իր էներգետիկան, իր համն ու հոտը: Միեւնույն ժամանակ, Երեւանը պետք է լինի նաեւ ժամանակակից ու հարմարավետ քաղաք՝ ինչպես բնակիչների, այնպես էլ հյուրերի համար»,-երեկ ասուլիսում նշել է Երեւանի քաղաքապետ Կարեն Կարապետյանը: Ինչպես հայտնում են քաղաքապետարանի լրատվական ծառայությունից, Կ. Կարապետյանը քաղաքային տնտեսության մեջ կարեւորելով բոլոր խնդիրները, ասել է, որ առաջնահերթ են ե՛ւ մանկապարտեզների, ե՛ւ աղբահանության, ե՛ւ ճանապարհների նորոգման հարցերը: Ըստ նրա, այդ ամենում կարեւոր օղակ է հանդիսանում նաեւ երեւանցին. «Եթե մենք չկարողանանք արթնացնել երեւանցու մեջ սեփականատիրոջ զգացումը, որ սա իր քաղաքն է եւ քաղաքում ինչ-որ կատարվում է՝ առնչվում է իր հետ, մենք կլինենք շատ ավելի պակաս արդյունավետ»:
