Երեկ կառավարության շենքի առաջ մի խումբ առեւտրականներ՝ ԱԺ պատգամավոր Զարուհի Փոստանջյանի աջակցությամբ, կողովներով միրգ ու բանջարեղեն էին վաճառում: Արտասովոր ցույցի շրջանակներում վաճառվում էր ձմերուկ, դեղձ, սեւ հաղարջ, կեռաս, ծիրան եւ այլ մրգեր: Այդ ապրանքները վաճառում էին շուկայականից ցածր՝ սիմվոլիկ գներով, քանի որ ակցիայի նպատակը ոչ թե փող աշխատելն էր, այլ՝ ՀՀ իշխանությունների ուշադրությունն իրենց անօգնական վիճակի վրա հրավիրելը: Մեկ հատ դեղձն արժեր 100 դրամ, կամ մեկ ձմերուկը, անկախ քաշից՝ 500 դրամ: Նշենք, որ առեւտրականների բոլոր ապրանքները վաճառվեցին: Այս կերպ առեւտրականները փորձում էին համոզել, որ իրենց աշխատանքը պահանջված է հասարակության կողմից: Բացօթյա առեւտրով զբաղվողներն արդեն մի քանի ամիս է՝ պայքարում են, որպեսզի կարողանան իրենց նախկին տեղերում առեւտուրը շարունակել: Նշենք, որ այս առեւտրականները պարբերաբար բողոքի ակցիաներ են անցկացնում Ազգային ժողովի, կառավարության եւ նախագահականի դիմաց:
«Առավոտի» հետ զրույցում Զարուհի Փաստանջյանն ասաց, որ ինքն ուղղակի օգնում է առեւտրի կազմակերպմանը. «Այս մարդիկ դիմել են մեր կուսակցությանը՝ իրենց դժգոհություններով, մենք էլ փորձում ենք օգնել: Հանդես ենք եկել օրենսդրական նախաձեռնությամբ, որով ցանկանում ենք կանոնակարգել խնդիրները: 3 օր առաջ բացօթյա առեւտուր անողների համակարգող խմբի անդամները հանդիպել են էկոնոմիկայի նախարար Տիգրան Դավթյանի հետ, սակայն այդ հանդիպումից դժգոհ են եւ դրա համար էլ որոշեցին կազմակերպել այս ակցիան»:
