Լիբիայի առաջնորդ Մուամմար Քադդաֆիի կառավարության տրամադրության տակ առկա վառելիքը, որը նախատեսված է զորքերի եւ բնակչության սպառման համար, ինչպես նաեւ ֆինանսական կանխիկ միջոցները, որոնք վճարվում են ռեժիմին հավատարիմ զինվորներին՝ սպառվում են: Այդ մասին, ըստ lenta.ru-ի, հայտարարել են Միացյալ Նահանգների հետախուզության պաշտոնական ներկայացուցիչները: Նրանց ասելով, վերջին օրերին ընդդիմադիր ուժերին հաջողվել է իրենց վերահսկողության տակ առնել Ջեբել-Նաֆուս լեռնային տարածքի մի շարք քաղաքներ ու Էզ-Զավիյ քաղաք մտնող նավթատար խողովակաշարը: Հիշեցնենք, որ հենց այս քաղաքում է տեղակայված երկրի ամենախոշոր եւ Տրիպոլիին վառելիքով ապահովող նավթավերամշակման գործարանը: Լիբիայի մայրաքաղաքում բենզինի եւ սոլյարկայի մատակարարումների ընդհատումները կարող են սկսվել արդեն ընթացիկ ամսում: Նման կանխատեսումներ է արել ամերիկյան հետախուզությունը: Նույն աղբյուրի մատուցմամբ, Քադդաֆին շուտով կբախվի նաեւ կանխիկ գումարի բացակայության փաստի հետ: ԱՄՆ պաշտոնական անձինք դա պայմանավորում են անցած շաբաթ Անկարայի կողմից լիբիական կառավարության «Արաբո» թուրքական բանկում հարյուրավոր միլիոն դոլարների հասնող ակտիվները սառեցնելու փաստով: Հետախուզության վերլուծաբանները ընդգծում են, թե ավելի հաճախ են տեղեկություններ ստացվում առ այն, որ լիբիական ընդդիմությունը շուտով կհաղթահարի արդեն եռամսյա փակուղային վիճակը, որը ստեղծվել է Քադդաֆիի ուժերի հետ պայքարի համատեքստում:
