![\"\"](\"https://www.aravot.am/2011/aravot_arm/July/14/p1.jpg\")
![\"\"](\"https://www.aravot.am/2011/aravot_arm/July/14/p1-2.jpg\")
Երեկ երեկոյան ոստիկանության Շենգավիթի բաժնի քրեական հետախուզության եւ տեղամասային բաժանմունքների մի քանի տեսուչներ փորձում էին ոստիկանություն տանել Բագրատունյաց 26 շենքի բնակիչ, 33-ամյա Արմեն Սարգսյանին: Վերջինս մեր այցելության պահին իր իսկ տան հյուրասենյակում «դեսերտի» սեղանի շուրջ կաթիլային էր ընդունում: Պատճառն այն է, որ հուլիսի 3-ին, ժամը 23.00-ի սահմաններում, իրենց շենքի բակում Ա. Սարգսյանի վրա կրակել էր անհայտ անձը եւ արտասահմանյան մակնիշի ավտոմեքենայով դիմել փախուստի: Նույն օրը՝ կեսգիշերին, բժիշկները վիրահատության արդյունքում նրա պարանոցից հանել են հրազենային գնդակ: Հիվանդանոց այցելած ոստիկաններին նա ներկայացել է կեղծ անվամբ, իսկ թե որտեղ է հրազենային վնասվածք ստացել հարցին, նա հայտնեց՝ Դավիթաշենում, Զովունիում, Արաբկիրի տարածքում եւ էլի մի քանի տեղեր: Երեկ երբ նրան հարցրի, թե ինչո՞ւ էր դեպքի վայրի տեղը թաքցնում, նա պատասխանեց՝ «Էրեխեքիս համար էի վախենում»: Նրա փաստաբան պարոն Միրզոյանը հորդորեց, որպեսզի բժիշկ հրավիրեն: Ոստիկանների կանչով բժիշկները ժամանեցին եւ հիվանդին զննելուց հետո հայտնեցին. «Ճիշտ է, կյանքին վտանգ չի սպառնում, սակայն ցանկալի է, որպեսզի նա մի քանի ժամ լինի պառկած վիճակում»: Բժիշկների գնալուց հետո ոստիկանները մնացին տանը՝ պնդելով՝ «որ արթնանա՝ պիտի տանենք բաժին»:
