![\"\"](\"https://www.aravot.am/2011/aravot_arm/July/13/p20.jpg\")
Աֆղանստանի նախագահ Համիդ Քարզայի կրտսեր եղբայրը՝ Ահմադ Վալի Քարզայը (նկարում), երեքշաբթի օրն իր տանը սեփական թիկնապահի կողմից գնդակահարվել է: Reuters-ի մատուցմամբ, թիկնապահը հասցրել էր երկու կրակոց արձակել, որից հետո ինքն էր սպանվել: Երկրի նախագահը հաստատել է եղբոր սպանության փաստը: Նախագահի եղբայրը Աֆղանստանի հարավում ամենաազդեցիկ դեմքերից մեկն էր ոչ միայն այն բանի շնորհիվ, որ Կանդագարի նահանգապետն էր, Քարզայների ընտանիքի ներկայացուցիչ, այլեւ ֆինանսական իր մեծ կարողության: Սպանության պատասխանատվությունը ստանձնել է «Թալիբան» շարժումը՝ հայտարարելով, որ դա պատերազմի 10 տարիների ընթացքում իր ամենամեծ հաջողություններից մեկն է:
Սպանությունից հետո Կանդագարի ոստիկանությունը լրացուցիչ պարեկա-պահակային կետեր է սահմանել, անվտանգության ծառայության գործակալները փողոցներում ամենուր են, քաղաքի կենտրոնում փակ են խանութները: Հանցագործությունը կատարվել է Աֆղանստանից օտարերկրյա զորքերի դուրսբերման ֆոնին: Նախագահի սպանված եղբայրը բավականին շատ թշնամիներ է ունեցել, նրա դեմ բազմաթիվ մահափորձեր են իրականացվել, բայց նա միշտ հաջողացրել է խույս տալ մահից:
