![\"\"](\"https://www.aravot.am/2011/aravot_arm/July/13/p13.jpg\")
Եվրախորհրդի մարդու իրավունքների Հանձնակատար Թոմաս Համմարբերգը «մտահոգիչ» է անվանել թուրքական դատարանի որոշումը՝ գրող Օրհան Փամուկին տուգանելու վերաբերյալ: Ինչպես հաղորդում է «Մեդիամաքսը», Թոմաս Համմարբերգը երեկ հրապարակել է իր զեկույցը՝ Թուրքիայում մարդու իրավունքների իրավիճակի վերաբերյալ: Զեկույցում նշվում է, որ 2500 եվրոյի չափով տույժ նշանակելու որոշման պատճառ է հանդիսացել Օրհան Փամուկի՝ 2006-ին շվեյցարական թերթին տված հարցազրույցը, որում գրողը խոսել էր 1 մլն հայերի եւ 30 հազար քրդերի սպանությունների մասին:
«Չնայած Թուրքիայում վերջին տարիներին գրանցած առաջընթացին՝ նախկինում զգայուն համարվող թեմաների բաց քննարկումների առումով, ԶԼՄ-ների ու արտահայտման ազատությունների իրավիճակը մտահոգիչ է մնում: Հրատապ միջոցներ են հարկավոր այդ իրավունքների եւ ազատությունների պաշտպանության, ինչպես նաեւ հանդուրժողականության մթնոլորտի ձեւավորման համար», – ասել է Եվրախորհրդի մարդու իրավունքների Հանձնակատարը:
