BBC-ի մատուցմամբ, Միացյալ Նահանգների Կոնգրեսի ներկայացուցիչների պալատը քվեարկությամբ դեմ է արտահայտվել ԱՄՆ-ի կողմից լիբիացի ապստամբներին օգնություն տրամադրելուն: Պենտագոնին արգելվել է նրանց զենք մատակարարել, ուսումնական վարժանքներ իրականացնել եւ նույնիսկ խորհրդատվություն մատուցել:
Պատգամավորները արգելել են Լիբիայի ընդդիմությանը ֆինանսապես օգնել, բայց ահա ՆԱՏՕ-ի կազմում Լիբիայի դեմ ռազմական գործողություններին մասնակցությունը դադարեցնելու մասին առաջարկը մերժել են, թեեւ կոնգրեսականների մի զգալի մասը կտրականապես դեմ է եղել այդ հակամարտությանը ԱՄՆ-ի մասնակցությանը:
Նախագահ Օբամայի ընդդիմախոսները պնդում են, որ մինչեւ Լիբիայի դեմ գործողություններ ձեռնարկելը՝ նա պիտի նախեւառաջ ստանար Կոնգրեսի համաձայնությունը:
Առաջարկին, որով արգելվում է երկրի պաշտպանական բյուջեից գումարներ ծախսել Մուամմար Քադդաֆիին տապալել փորձող ընդդիմությանը զենք մատակարարելու համար, ընդունվել է 225 «կողմ», 201 «դեմ» ձայների հարաբերակցությամբ: Այդուհանդերձ, մինչեւ արգելքն ուժի մեջ մտնելը այն պիտի հաստատվի նաեւ Վերին պալատում, որից հետո միայն օրինագիծը կներկայացվի նախագահի վավերացմանը:
