Հայաստանի ազգային պատկերասրահում երեկ բացվել է «Դալին ու սյուրռեալիստները» խորագրով ցուցահանդեսը: Ինչպես հաղորդում է «Մեդիամաքսը», ցուցահանդեսին ներկայացված են հայտնի նկարիչների 160 աշխատանքներ, որոնց հիմնական մաս են կազմում Սալվադոր Դալիի օֆորտները: Ցուցահանդեսին ներկայացված են նաեւ այնպիսի սյուրռեալիստների աշխատանքներ, ինչպիսիք են Հանս Բելմերը, Լեոնոր Ֆինին, Ջորջո դե Կիրիկոն, Ժան Կոկտոն եւ Վասիլի Կանդինսկին:
Բոլոր աշխատանքները, որոնք Պիեր Արժիլեի մասնավոր հավաքածուի մի մասն են կազմում, տրամադրել է նրա դուստրը` Քրիստինա Արժիլեն, ով այս օրերին Երեւանում է: «Դալին եւ սյուրռեալիստները» ցուցահանդեսի հետ միաժամանակ պատկերասրահում եւս մեկ ցուցահանդես է բացվել` «Սյուրռեալիզմը եւ հայ նկարիչները»: Ցուցահանդեսում ներկայացված են Երվանդ Քոչարի, Սերգեյ Փարաջանովի, Գայանե Խաչատրյանի, Լեւոն Թութունջյանի եւ Արշիլ Գորկու աշխատանքները:
