![\"\"](\"https://www.aravot.am/2011/aravot_arm/July/8/p19.jpg\")
Անցած գիշեր Վրաստանում կալանավորվել են նախագահ Միխայիլ Սահակաշվիլիի անձնական լուսանկարիչը՝ Իրակլի Գեդենիձեն (նկարում) եւ նրա կինը: Այդ մասին հաղորդում է GHN-ը: Գործակալության տեղեկություններով, կալանավորման պատճառների մասին առայժմ ոչինչ հայտնի չէ: Փոխարենը IPN-ը հաղորդում է Վրաստանի ոստիկանության կողմից եւս մի քանի ֆոտոթղթակիցների՝ European Pressphoto Agency-ի լուսանկարիչ Զուրաբ Կուրցիկաձեի, Associated Press-ի լուսանկարիչ Շահ Այվազովի (նրան հարցաքննելուց հետո ազատ են արձակել), նաեւ Վրաստանի ԱԳՆ-ի լուսանկարիչ Գեորգի Աբդալաձեի կալանավորման մասին: Վերջինիս կինը հաղորդել է, թե իրենց տանը խուզարկություն է եղել, եւ իրավապահ մարմինների աշխատակիցներն առգրավել են բջջային հեռախոսներն ու համակարգիչները: Աբդալաձեի զոքանչն ասել է, թե իր փեսան կասկածվում է լրտեսության մեջ: Ուժայինները խուզարկել են նաեւ Կուրցիկաձեի բնակարանը: Վրացական աղբյուրների մատուցմամբ, լրտեսության մեղադրանք է առաջադրվելու բոլոր կալանավորվածներին:
