ԴՎՈՐԿՈՎԻՉԻ ԳԱՎԱԹԸ ԵԿԱՎ ՀԱՅԱՍՏԱՆ

Մոսկվայում Վլադիմիր Դվորկովիչի հիշատակին նվիրված վեցերորդ պատանեկան թիմային մրցաշարը, որում ութ ուժեղագույն հավաքականներ պայքարում էին շախմատի ճանաչված միջազգային մրցավարի գավաթին տիրելու համար, ավարտվեց Հայաստանի հավաքականի փայլուն հաղթանակով:

Մասնագետների բնորոշմամբ, Դվորկովիչի գավաթի խաղարկությունն այս տարիքային խմբում աշխարհի ամենաուժեղ թիմային մրցաշարն է, անգամ համաշխարհային օլիմպիադայից ուժեղ, քանի որ այստեղ մասնակից յուրաքանչյուր երկիր ասպարեզ է հանում իր լավագույն շախմատիստներին: Այս իրողությունը ռուսաստանյան լրատվամիջոցների հետ զրույցում հաստատել է նաեւ Հայաստանի հավաքականի մարզիչ, գրոսմայստեր Արսեն Եղիազարյանը:

Հենց մեկնարկային տուրից ստանձնելով առաջատարի դերը՝ մեր պատանիներն այն պահպանեցին մինչեւ վերջ: Ամբողջ մրցաշարի ընթացքում մեզ շրջանցելու՝ Չինաստանի, Ուկրաինայի եւ Ադրբեջանի գործադրած բոլոր ճիգերն անարդյունք եղան՝ ի վերջո վերածվելով 2-րդ եւ 3-րդ տեղը միմյանց միջեւ բաժանելու պայքարի, որում չինացիները եւ ուկրաինացիները գերազանցեցին մեր հարեւան երկրին: Ճիշտ է, Չինաստանին հաջողվեց անհատական պայքարում ավելի շատ միավոր վաստակել մեզանից, սակայն սա թիմային պայքար էր, որում հաշվի են առնվում միայն թիմային միավորները: Այսպիսով, Վլադիմիր Դվորկովիչի գավաթի վեցերորդ խաղարկության ամփոփիչ մրցաշարային աղյուսակն այսպիսի տեսք ունեցավ:

1.Հայաստան 24 (38,5

միավոր)

2. Չինաստան 23 (40,5)

3. Ուկրաինա 18 (32,5)

4. Ադրբեջան 15 (29,5)

5. Ռուսաստան 11 (25,5)

6. Դվորկովիչ 9 (23,0)

7. Բելառուս 8 (22,5)

8. Ղազախստան 4 (13,5)

Սակայն մեր շախմատիստները Մոսկվայից միայն թիմային հաղթանակով չեն տուն վերադարձել: Առաջին խաղատախտակի առջեւ լավագույն արդյունք ցույց տվեց միջազգային վարպետ Կարեն Գրիգորյանը: Նա 14 հնարավորից վաստակեց 13,0 միավոր, ինչը նաեւ մրցաշարի բացարձակ լավագույն ցուցանիշն է: Թիմակցից ետ չմնաց նաեւ Հովհաննես Գաբուզյանը (9,5)՝ նույնպես հավասարը չունենալով երկրորդ խաղատախտակի առջեւ հանդես եկածների մեջ: Երրորդ համարով հանդես եկած Տիգրան Հարությունյանը 8,0 միավորով ճանաչվեց երրորդը, իսկ միակ աղջնակը՝ Սուսաննա Գաբոյանը, բավարարվեց չորրորդ տեղով (8,0 միավոր), ինչը նույնպես նվաճում է: