Մոսկվայում շախմատի Հայաստանի պատանիների հավաքականը մեկօրյա հանգստից հետո անհաջող վերսկսեց պայքարը միջազգային մրցավար Վլադիմիր Դվորկովիչի գավաթի վեցերորդ խաղարկությունում: Միանձնյա առաջատարի դերում հանդես եկող մեր թիմը 1:3 հաշվով զիջեց երկրորդ տեղում ընթացող Ադրբեջանին: Միակ հաղթանակը տոնեց առաջին խաղատախտակի առջեւ հանդես եկող Կարեն Գրիգորյանը: Ափսոս, մեր մյուս երեք շախմատիստները՝ Հովհաննես Գաբուզյանը, Տիգրան Հարությունյանը եւ Սուսաննա Գաբոյանն իրենց պարտիաները տանուլ տվեցին: Այդուհանդերձ, մեր պատանիները պետք է որ մնային առաջին հորիզոնականում: Սակայն դա կախված էր լինելու մյուս հանդիպումներում գրանցվելիք արդյունքներից:
