ՄԵԾ ԳՈՒՄԱՐՆԵՐ ԵՆ ԿՈՐՑՐԵԼ, ԲԱՅՑ ՇԱՏ ԷԼ ԳՈՀ ԵՆ

Կառավարությունն էլ առայժմ չի պատրաստվում նրանց փոխհատուցել

Այս տարվա ապրիլին կառավարությունը որոշեց վարորդների հոգսը թեթեւացնել, եւ, այսպես ասած, «փսիխո» հանելու համար նարկոլոգիական եւ հոգեբուժական կլինիկաներից տեղեկանք ստանալու համար 5-հազարական դրամներ չգանձել: Ըստ կառավարության որոշման, այսուհետեւ վարորդական իրավունք ստանալու համար պահանջվող տեղեկությունները ճանապարհային ոստիկանությանը անվճար է տրամադրվելու: Մինչ այդ, անձի վերաբերյալ սույն տեղեկությունը տրամադրել են առողջապահության նախարարության ենթակայության տակ գտնվող հիվանդանոցները:

Այս որոշումը, իհարկե, ողջունելի էր, սակայն, մեր տեղեկություններով, այսօր այդ փաստաթուղթը տրամադրող հիվանդանոցների բյուջեն այդ գումարների կրճատման հետեւանքով լուրջ՝ միլիոնների վնասներ է կրում եւ կանգնած են կադրերի կրճատման խնդրի առջեւ: Մի հասարակ հաշվարկից պարզ է դառնում, թե հիվանդանոցները «փսիխոյից» որքան գումարներ են ստացել, որոնք ուղղվել են մի շարք խնդիրների լուծմանը: Պաշտոնական տվյալներով, դեռեւս 2009-ին 50 հազարից ավելի մարդ վարորդական իրավունք է ստացել, այսինքն՝ այդ տարի հիվանդանոցներին վճարվող գումարները կազմել են մոտ 250 միլիոն դրամ: Էլ չենք ասում, որ տարեցտարի վարորդների թիվն ավելանում է:

Նշենք, որ բուժհիմնարկներին այդ գումարները փոխհատուցելու մասին ՀՀ կառավարությունն առայժմ ոչ մի ձայն չի հանում:

«Առավոտը» փորձեց հանրապետության գլխավոր նարկոլոգից եւ հոգեբույժից տեղեկանալ, թե ինչպե՞ս են հոգում իրենց ծախսերը՝ առանց այդ միլիոնների:

Որքան էլ զարմանալի էր, մեր զրուցակիցները առանձնապես դժգոհ չէին, որ իրենց բյուջեները զգալի տուժել են: Նրանք պնդում էին, որ իրենց համար կարեւորը՝ «Ժողովրդին լավ լինի»:

Նարկոլոգիական հիվանդանոցի տնօրեն Պետրոս Սեմերջյանը մեզ հետ զրույցում ասաց, որ կառավարությունը նման որոշում է կայացրել, որպեսզի ավելորդ քաշքշուկները վերացնի. «Մեր երկրի կառավարությունը որոշում է կայացրել հօգուտ մարդկանց»: Մեր այն հարցին, թե գո՞հ են կառավարության որոշումից, պարոն Սեմերջյանն ասաց. «Մենք ո՛չ գոհ ենք, ոչ էլ՝ դժգոհ: Մենք կարծում ենք, որ կառավարությունը ճիշտ որոշում է կայացրել: Մեր կլինիկան պետպատվեր է ստանում եւ դրանով իր հոգսերը հոգում է»:

Իսկ առողջապահության նախարարությունից վստահեցրին, որ նարկոլոգիական հիվանդանոցը իր խոշոր ծախսերը կատարում է միջազգային դոնորների գումարների հաշվին:

«Առավոտը» Պետրոս Սեմերջյանից հետաքրքրվեց, թե տարեկան որքա՞ն է կազմում «փսիխոյից» ստացած գումարը: «Դա մեծ գումար չէ, դա հիվանդանոցի բյուջեի աննշան մասն է կազմում»,- ասաց տնօրենը: Այսինքն՝ ձեր բուժհաստատությունը կառավարության որոշումից չի՞ տուժել մեր հարցին էլ պարոն Սեմերջյանն ասաց. «Գիտեք, եթե երկրի վիճակը լավ է, հիվանդանոցը չի կարող դրանից տուժել»: Ուզում եք ասել՝ երկրի վիճակը լա՞վ է, հետաքրքրվեցինք բուժհիմնարկի տնօրենից: «Նենց ա՝ ոնց որ կա»,- պատասխանեց տնօրենը: Նաեւ հարցրինք՝ արդյոք պետբյուջեից տրամադրվող գումարները բավակա՞ն են իրենց խնդիրները լուծելու համար, բուժհաստատության ղեկավարն ասաց. «Փողը միշտ էլ բավական չէ»:

Հանրապետության գլխավոր հոգեբույժ Սամվել Թորոսյանն էլ, որը ղեկավարում է նաեւ հոգեբուժական կենտրոնը (այս կենտրոնի մեջ է մտնում նաեւ նարկոլոգիական կլինիկան), մեզ հետ զրույցում թեեւ վստահեցրեց, որ ողջունում է այդ որոշումը, բայց նաեւ հավաստեց, որ գումարների որոշակի վնասներ կրել են. «Հաշվարկներն արդեն արվել են, եւ մեր ղեկավարությունը տեղյակ է այդ մասին ու ընթացքի մեջ է խնդրի լուծումը»: Ինչ վերաբերում է գումարների սղության պատճառով կադրերի կրճատմանը, ապա պարոն Թորոսյանը վստահեցրեց, որ ոչ մի կադր չի կրճատվելու: