Երեկ վարչական դատարանում «Global gold» ընկերության հայցն էր լսվում՝ ընդդեմ պետական ռեգիստրի: «Global gold»-ը մեղադրում է, որ պետռեգիստրը ապօրինի կարգով հայաստանյան ընկերության 100 տոկոս բաժնեմասը գրանցել է «Կալդերա ռեսուրսիզի» անունով: Ընկերության տնօրեն Աշոտ Պողոսյանը վստահեցնում է, որ այդ գործարքը կատարվել է իրենցից գաղտնի, առանց բաժնեմասի օտարման պայմանագրի, կեղծ կնիքի եւ այլ կեղծ փաստաթղթերի օգտագործմամբ: Գրանցումը կատարվել է առանց գույքի սեփականատիրոջ մասնակցության եւ իմացության. «Գրանցման եւ գույքի սեփականության նոր վկայագրի տրամադրման ամբողջ գործընթացը տեւել է ընդամենը 1.5 ժամ, ինչը աննախադեպ է եւ անհնար»: Դատական գործընթացը սկսվել է դեռեւս նախորդ տարվա սեպտեմբեր ամսից, եւ մինչ օրս տարբեր պատճառաբանություններով դատական նիստերը հետաձգվել են:
Նախորդ նիստի ժամանակ դատավորն արդեն հայտարարել էր, որ այս նիստին արդեն վճիռ կկայացվի, սակայն այդպես էլ այն չստացվեց:
Նշենք, որ նախորդ նիստերից մեկում 3-րդ կողմը՝ «Կալդերա ռեսուրսիզի» ներկայացուցիչը, պահանջել էր դատավորի ինքնաբացարկ, ինչն էլ ընդունվել էր: Այս անգամ էլ 3-րդ կողմը նոր դատավոր Ռուզաննա Հակոբյանից ինքնաբացարկ պահանջեց: Դատավորը վճռի կայացումը հետաձգեց՝ գործի քննության շարունակության պատճառաբանությամբ, ինչպես նաեւ պատասխանող կողմի բացակայության պատճառով:
