![\"\"](\"https://www.aravot.am/2011/aravot_arm/June/25/p24.jpg\")
2008 թվականից «Էրեբունի» պատմահնագիտական արգելոց-թանգարանը գիտական եւ տեխնիկական համագործակցություն է իրականացնում ֆրանսիացի մասնագետների հետ՝ նպատակ ունենալով նպաստել հնավայրի գիտական ճանաչման ընդլայնմանը, հայտնաբերված ու դեռեւս հայտնաբերման ենթակա մնացորդների անվտանգ պահպանությանը, հնավայրի հանրահռչակմանը, ինչպես նաեւ մշակութային այլ մտահղացումներին: Այս համագործակցության առանցքում դրված են նաեւ հնավայրի ուսումնասիրության պատմությանը վերաբերող փաստավավերագրական նյութի ամբողջացումը եւ գիտակրթական նշանակության կարեւորումը, մասնավորապես՝ մասնագիտական կրթություն ստացող ուսանողներին պեղումների գործաշրջանին ներգրավման միջոցով:
Այս տարվա հունիսի 4-ից Էրեբունի միջնաբերդում քառամյա գիտահետազոտական ծրագրի վերջին գործաշրջանն է իրականացնում հայ-ֆրանսիական հնագիտական արշավախումբը: Ֆրանսիական առաքելությունը ղեկավարում է Բրետանի հնագիտական ծառայության ղեկավար Ստեֆան Դեշամպը: Արշավախմբի կազմում են նաեւ հնագետներ Ֆրանսուա Ֆիշե Դը Կլերֆոնտենը (Ներքին Նորմանդիայի հնագիտական ծառայության ղեկավար) եւ Վինչենզո Մուտարելլլին (Մերձծովյան Սեն դեպարտամենտ): Այսօր արշավախումբը կհուրընկալի ՀՀ-ում Ֆրանսիայի Հանրապետության արտակարգ եւ լիազոր դեսպան Անրի Ռոնոյին՝ այս օրերին Հայաստանում գտնվող ֆրանսիացի դիվանագետների հետ: Այցելության նպատակը Երեւանի օրրանի՝ Էրեբունի ամրոցի, հայ-ֆրանսիական պեղումների արդյունքների եւ թանգարանի մշտական ցուցադրության հետ ծանոթությունն է:
